లాస్ ఏంజిల్స్ లో అన్నమయ్య జయంతి

లాస్‌ ఏంజిల్స్‌: సముద్రాలకు అవతల అన్నమయ్య జయంతిని తెలుగువారు వైభవంగా జరుపుకున్నారు. శ్రీ వేంకటేశ్వర అన్నమాచార్య సొసైటీ ఆఫ్‌ అమెరికా (ఎస్‌ వీఎస్‌ ఏ) ఆధ్వర్యంలో తాళ్లపాక అన్నమాచార్య 602వ జయంతిని ఘనంగా నిర్వహించారు. ఇందుకు శ్రీరామ్‌ కబిర్‌ మందిర్‌ వేదికైంది. కార్యక్రమానికి ముందుగా వూరేగింపు, నగరసంకీర్తన నిర్వహించారు. దారిపొడువునా శ్రీవారిని ఉద్దేశిస్తూ అన్నమయ్య కలం నుంచి జాలువారినసంకీర్తనలను ఆలపించారు.

ఆహూతులు అన్నమయ్య సంకీర్తనాలాపనలో తన్మయత్వం పొందారు. కార్యక్రమానికి 'ఎస్‌ వీఎస్‌ ఏ' అధ్యక్షుడు సత్య సువ్వూరి సారధ్యం వహించారు. కార్యక్రమం ఆద్యంతం ఆధ్యాత్మికత ఉట్టిపడింది. చివర్లో మూడేళ్ల వయసున్న చిన్నారి భావన "ముద్దుగారే యశోధ" అనే సంకీర్తన ఆలపించి ప్రేక్షకులను మంత్రముగ్ధులను చేసింది.