రాష్ట్రం కోసం తెలంగాణ ఎన్నారైలు

తెలంగాణ రాష్ట్ర ఏర్పాటు డిమాండ్ కోసం డిసెంబర్ 12వ తేదీన దాదాపు 250 డల్లాస్ ఏరియా తెలంగాణ ఎన్నారైలు రుచి ప్యాలెస్ లో సమావేశమయ్యారు. తెలంగాణ రాష్ట్ర ఏర్పాటు ప్రక్రియను ప్రారంభిస్తున్నట్లు కేంద్ర హోం మంత్రి చిదంబరం ప్రకటన చేసి ఏడాది అయిన సందర్భంగా ఈ సమావేశం జరిగింది. మహేందర్ గనపురం, శ్రీనివాస్ దామెర మోడరేటర్లుగా వ్యవహరించారు. తెలంగాణ అమరవీరులకు సంతాపసూచకంగా సమావేశం రెండు నిమిషాల పాటు మౌనం పాటించింది. నిరుడు డిసెంబర్ 9వ తేదీ నుంచి జరిగిన పరిణామాల గురించి ప్రముఖ గాయకుడు దేశపతి శ్రీనివాస్ ఇండియా నుంచి మాట్లాడారు. ఎపిఎస్ఆర్టీసి రిటైర్డ్ ఎగ్జిక్యూటివ్ ఎంవి రావు ముఖ్య అతిథిగా హాజరై తెలంగాణ రాష్ట్ర ఆవశ్యకత గురించి, అందుకు తెలంగాణ ఎన్నారైల కృషి ఆవసరం గురించి మాట్లాడారు. తెలంగాణ ఆవిష్కరణ దినోత్సవం ప్రత్యేకత గురించి పవన్ నెల్లుట్ల వివరించారు. తెలంగాణ ఉద్యమాన్ని ముందుకు నడిపించే తీరుపై అజయ్ రెడ్డి ప్రసంగించారు. బాలగంగాధర్ తిలక్ గణేశ్ ఉత్సవాలను వాడుకున్నట్లుగా తెలంగాణ ఉద్యమాన్ని బలోపేతం చేయడానికి బతుకమ్మ పండుగను వాడుకోవాలని ఆయన సూచించారు.

శ్రీకృష్ణ కమిటీ నివేదిక తెలంగాణ ప్రజల మనోభావాలకు అనుగుణంగా ఉంటుందనే నమ్మకం లేదని, తెలంగాణ రాష్ట్రం సాధించే వరకు శాంతియుతంగా ఉద్యమాన్ని నడిపించాలని సమావేశం తన అభిప్రాయం వ్యక్తం చేసింది. విద్యార్థులపై కేసులను ఎత్తేయడంలో రాష్ట్ర ప్రభుత్వం తీరును సమావేశంలో విమర్శించారు. విజయవాడ అల్లర్ల కేసులను, ఢిల్లీ అల్లర్ల కేసులను ఎత్తేసినప్పుడు విద్యార్థులపై పెట్టిన కేసులను ఎత్తేయడానికి వచ్చిన ఇబ్బందులేమిటని వక్తలు ప్రశ్నించారు. రఘువీరా రెడ్డి, సుధీర్ గూడ, మహేంద్ర గణపురం, శ్రీనివాస్ దామెర, సురేష్ రెడ్డి, శ్రీనివాస్ తిప్పన, రామ్ కాసర్ల, పవన్ నెల్లుట్ల, అజయ్ రెడ్డి, అనిల్ బొద్దు, అనంత్ పజ్జూరు, సతీష్ రెడ్డి, వెంకట్ కొండల, భాస్కర్ గార్లపాటి, రఘు చిట్టిమల్ల, గంగ దేవర, రవి వెనిశెట్టి, అరవింద్ రెడ్డి, స్వరూప్ కుందూరు, శ్రీని రెడ్డి, రఘువీర్ బండారు, వెంకట్ షేరి, శ్రీనివాస్ సురకంటి, తదితురులు ఈ సమావేశంలో పాల్గొన్నారు. నాలుగు కోట్ల తెలంగాణ ప్రజల ఆకాంక్ష మేరకు వెంటనే తెలంగాణ రాష్ట్ర ఏర్పాటుకు చర్యలు తీసుకోవాలని సమావేశం కేంద్ర ప్రభుత్వాన్ని కోరింది.