తెలంగాణ లాయర్లకు ఎన్నారైల మద్దతు

న్యాయవ్యవస్థలో 42 శాతం వాటా కోసం తెలంగాణ న్యాయవాదులు చేస్తున్న ఆందోళనకు సింగపూర్ లోని తెలంగాణ మిత్రులు మద్దతు పలికారు. తెలంగాణ ప్రాంతం పట్ల అమలవుతున్న వివక్షను, అణచివేతను ఎత్తిచూపడానికి తెలంగాణ న్యాయవాదులు ఆందోళనకు దిగడం ప్రశంసనీయమని వారన్నారు. న్యాయం చేయాలని వారు పోరాటం చేయడాన్ని వారు సమర్థించారు. హైకోర్టు, అడ్మినిస్ట్రేటివ్ ట్రిబ్యునల్, ఇతర న్యాయసంబంధమైన సంస్థల్లోని ఉద్యోగాల్లో న్యాయమైన వాటా కోసం ఉద్యమిస్తున్న తెలంగాణ న్యాయవాదులను ప్రతి ఒక్కరు బలపరచాలని సింగపూర్ తెలంగాణ మిత్రులు (ఎస్టీఎఫ్) కోరారు.

తెలంగాణ రాష్ట్ర ఏర్పాటు కోసం ఉద్యమిస్తున్న తెలంగాణ న్యాయవాదులకు మద్దతు తెలపాలని వారు శాసనసభ్యులను, ఎమ్మెల్సీలు, పార్లమెంటు సభ్యులను కోరారు. తెలంగాణకు జరుగుతున్న అన్యాయం పట్ల తమను చైతన్యం చేయడానికి కృషి చేస్తున్న తెలంగాణ న్యాయవాదుల జెఎసికి వారు కృతజ్ఞతలు తెలిపారు. తెలంగాణ రాష్ట్ర ఏర్పాటు కోసం ఐక్యంగా ఉద్యమించాలని వారు పిలుపునిచ్చారు.