అమెరికాలో వైభవంగా శ్రీనివాస కల్యాణం

కాలిఫోర్నియా: అమెరికాలో భారతీయులు ఎక్కువగా ఉండే కాలిఫోర్నియా సన్నివేల్‌ ఆలయంలో ఆదివారం శ్రీనివాస కల్యాణం వైభవంగా జరిగింది. అమెరికా కాలమానం ప్రకారం ఉదయం ఆరు గంటల నుంచి వరుసగా స్వామి వారికి సుప్రభాతం, తోమాల, అర్చన సేవలను నిర్వహించారు. అనంతరం తొమ్మిది గంటల నుంచి ఆలయ ఆడిటోరియం వేదికపై శ్రీనివాస కల్యాణం వందలాది మంది భక్తజనుల మధ్య నిర్వహించారు. మధ్యాహ్నం 12 గంటలకు మహా ప్రసాదం పంపిణీ చేశారు.

సన్నివేల్‌ ఆలయంలో వినాయక, బాలాజీ, మహావీర్‌, హనుమంతు, రామ పరివారం, జగన్నాధ, దుర్గ అనుబంధ ఆలయాలున్నాయి. శ్రీనివాస కల్యాణం నేపథ్యంలో ఆలయంలో విశేష పూజలు చేశారు. అర్చకులు హోమం కూడా నిర్వహించారు. ఈనెల ఒకటిన న్యూజెర్సీ గురువాయురప్పన్‌ ఆలయంలో స్వామి వారి కల్యాణం జరిగింది.