తెలుగువారి భద్రతపై తానా ప్రచారం కార్యక్రమం

వాషింగ్టన్‌: అమెరికాలో నివసించే తెలుగు యువకులు, విద్యార్థుల్లో భద్రతపై అవగాహన పెంచేందుకు ఉత్తర అమెరికా తెలుగు సంఘం (తానా) భారీ ప్రచార కార్యక్రమాన్ని చేపట్టింది. గడిచిన ఏడాది కాలంలో వరుస హత్యలు, రోడ్డు ప్రమాదాలు జరుగుతున్న నేపథ్యంలో తానా ఈ కార్యక్రమానికి శ్రీకారం చుట్టింది. గత ఏడాదిన్నర కాలంలో అమెరికాలోని వేర్వేరు ప్రాంతాల్లో 30 మంది తెలుగు వారు మరణించారని తెలిపింది.

"భవిష్యత్తులో ప్రమాదాలను నివారించేందుకు అమెరికా, కెనడాల్లోని పలు నగరాలు, విశ్వవిద్యాలయాలకు వెళ్లి యువత, విద్యార్థులకు భద్రతా సదస్సులు నిర్వహించాలని తానా యోచిస్తోంది" అని సంస్థ తెలిపింది. తానా అత్యవసర సేవలు, నిర్వహణ బృందం (టీమ్‌) సభ్యులు భద్రతపై సూచనలతో తెలుగు, ఆంగ్ల భాషల్లో రూపొందించిన కరపత్రాలను అందుబాటులో ఉంచినట్లు తానా అధ్యక్షుడు కోమటి జయరాం తెలిపారు.