యుఎస్ సీనియర్ దౌత్యవేత్తగా తెలుగు భాస్కరుడు

జెద్ధా: ఇండియన్ ఫారిన్ సర్వీసు (ఐఎఫ్ ఎస్) కు చెందిన తెలుగు అధికారికి ఉన్నత పదవి లభించింది. వాషింగ్టన్‌ లోని భారతీయ ఎంబసీలో సీనియర్ దౌత్యవేత్తగా, ఆర్ధిక వ్యవహారాల విభాగం అధిపతిగా బి.బాలభాస్కర్ పదవీ బాధ్యతలు స్వీకరించనున్నారు. ఇప్పటి వరకు విదేశీ వ్యవహారాల మంత్రిత్వ శాఖ కార్యాలయంలో లాటిన్ అమెరికా దేశాల వ్యవహారాలను పరిశీలించిన ఆయన బ్రెజిల్ ‌తో ఆర్ధిక సంబంధాలు పెంపొందించడానికి ప్రయత్నంచేశారు. లాటిన్ అమెరికాతో భారత వ్యూహత్మక వాణిజ్య మరియు ఆర్ధిక ప్రయోజనాలను అభివృద్ధి చేసినందుకు ఆయన్ను కీలకమైన వాషింగ్టన్‌లోని భారతీయ ఎంబసీలో ఆర్ధిక వ్యవహారాలను కేంద్రం అప్పగించింది.

సౌదీ అరేబియా, ఈజిప్టు మరియు పాలస్తీనాలో పనిచేసిన ఆయన హైదారాబాద్‌లో పాస్‌పోర్ట్ అధికారిగా కూడా పనిచేశారు. బాలభాస్కర్ హాయాంలో హైదారాబాద్‌లోని పాస్‌పోర్ట్ కార్యాలయం దేశంలోనే అత్యధిక పాస్‌పోర్టులు జారీచేయడంతో పాటు ఉన్నత ప్రమాణాలు పాటించినందుకు ఐ.యస్.ఒ సర్టిఫికెట్ కూడా పొందింది. కంప్యూటరీకరణ మరియు ఆన్‌ లైన్ దరఖాస్తు విధానాలకు ఆయన హాయాంలోనే శ్రీకారం చుట్టడం జరిగింది. జిల్లాలలో పాస్‌పోర్ట్ మేళాలను కూడా నిర్వహించడం జరిగింది.

నెల్లూరు జిల్లా కావలి మండలంలోని ఓ కుగ్రామానికి చెందిన బాలభాస్కర్ దౌత్యవేత్తగా అంతర్జాతీయ స్ధాయిలో రాణిస్తున్నారు. ఆయనకు భార్య మరియు ఇద్దరు పిల్లలున్నారు. మైక్రోసాఫ్ట్ ఆఫీసు సర్టిఫికేషన్‌ లో ప్రపంచంలో అతి పిన్న వయస్కుడుగా ఆరేళ్ళ వయసులో ఆయన కొడుకు అనుదీప్ రికార్డు సృష్టించాడు.