మినిసోటా తెలుగు సంఘం ఉగాది ఉత్సవాలు

బ్లూమింగ్టన్: వికృతి నామ సంవత్సరానికి స్వాగతం పలుకుతూ తెలుగు అసోసియేషన్ ఆఫ్ మినిసోటా(టిఇఎఎమ్-టీమ్) ఆధ్వర్యంలో 1000 మంది తెలుగు వారు హాజరు కాగా, ఇటీవల బ్లూమింగ్‌టన్ లోని జెఫర్‌ సన్ హై స్కూల్లో ఉగాది ఉత్సవాలు అంగరంగ వైభవంగా జరిగాయి. పండగ వాతావరణం కనిపించే విధంగా మామిడి ఆకులతో, సాంప్రదాయక కలశంతో వేదికను అలంకరించారు. ఈ కార్యక్రమం సాయంత్రం 5:00 గంటలకు ప్రారంభమై మూడు గంటల పాటు వినోదాన్ని అందించింది. టీమ్ కార్యనిర్వహకులు, వాలంటీర్స్ కలిసి ఉగాది శుభాకాంక్షలతో అతిథులను ఆహ్వానించారు.

వినాయక స్తోత్రంతో కార్యక్రమం ప్రారంభమైంది. టీమ్ సమన్వయకర్తగా శైలజా మామిడన్న విచ్చేసిన అతిథులకు ఉగాది శుభాకాంక్షలు తెలుపుతూ స్వాగత వచనాలు పలికారు. గత మూడు నెలలుగా చిన్నారులు, పెద్దలు కలిసి జరగబోయే ఈ వేడుక కోసం శాస్త్రీయ, జానపద, సినిమా పాటలకు ఎంత గానో సాధన చేశారని ఆమె కార్యక్రమాన్ని గురించి క్లుప్తంగా వివరించారు. తల్లిదండ్రులు పనిలో బిజీగా ఉన్నా చిన్నారులకు నేర్పించడంలో మూడు నెలలుగా కృషి చేశారని ప్రత్యేక కృతజ్ఞతలు తెలిజేశారు. ఈ వేడుకకు ప్రియా చౌదరి, సంతోషి వేమూరి ఎం.సిలుగా వ్యవహరించారు.