సింగపూర్ లో ఘనంగా ఉగాది వేడుకలు

సింగపూర్: సింగపూర్‌ తెలుగు సమాజం ఆధ్వర్యంలో ప్రవాసాంధ్రులు ఉగాది వేడుకలను ఘనంగా జరుపుకున్నారు. స్థానిక విక్టోరియా కన్సుర్ట్‌ హాల్‌లో జరిగిన ఈ కార్యక్రమానికి బళ్లారి ఎమ్మెల్యే గాలి సోమశేఖర్‌ రెడ్డి ముఖ్య అతిథిగా విచ్చేశారు. ఈ సందర్భంగా ఏర్పాటు చేసిన సాంస్కృతిక కార్యక్రమాలకు ప్రగతి వ్యాఖ్యాతగా వ్యవహరించగా, నాట్య విశారద సత్యనారాయణ బృందంతో చేసిన నృత్య నాటిక ఆముక్త మాల్యద సభికులను కట్టిపడేసింది.

మిమిక్రీ కళాకారులు రవి చేసిన మిమిక్రీ ఆద్యంతం రంజిపచేసింది. సత్య మాస్టర్‌ బృందం చేసిన డాన్సులు ప్రేక్షకులను విశేషంగా ఆకట్టుకున్నాయి. అనంతరం కమిటీ సభ్యులకు, బాడ్మింటన్‌ విజేతలకు, కళాకారులకు, ముఖ్య అతిథి సోమశేఖర్‌ రెడ్డి చేతుల మీదుగా బహుమతులు ప్రధానం చేశారు. ఈ కార్యక్రమం ఆనందోత్సాహల మధ్య జరగడానికి సహకరించిన ప్రతీ ఒక్కరికీ సింగపూర్‌ తెలుగు అసోషియేషన్‌ అధ్యక్షులు అరిమిల్లి రాధాకృష్ణ కృతజ్ఞతలు తెలియజేశారు.