శ్రీకృష్ణపై తెలంగాణ ఎన్నారైల గుర్రు

శ్రీకృష్ణ కమిటీ నివేదికను చికాగో తెలంగాణ సంఘం (చిటా) ఖండించింది. ఆంధ్ర ప్రాంత లాబీయిస్టుల ప్రభావంతో శ్రీకృష్ణ కమిటీ నివేదిక విశ్లేషణలు, సిఫార్సులు ఉన్నాయనేది స్పష్టమవుతోంది సంఘం విమర్శించింది. శ్రీకృష్ణ కమిటీ నివేదిక సిఫార్సులు హేతురహితంగా, ఆచరణా సాధ్యం కానివిగా, బాధ్యతారహితమైనవిగా ఉన్నాయని తప్పు పట్టింది. తెలంగాణ ప్రాంత సామాన్య మానవుడి కనీస అంచనాల మేరకు కూడా కమిటీ నివేదిక లేకపోవడం దురదృష్టకరమని సంఘం ప్రతినిధులు వ్యాఖ్యానించారు. తెలంగాణ రాష్ట్ర ఏర్పాటు కోసం పోరాటం సాగుతుందని వారు స్పష్టం చేశారు.

తెలంగాణ సమాజంలోని అన్ని వర్గాలకు తెలంగాణ ఆకాంక్ష చేరిందని, ఆ వర్గాలన్నీ తెలంగాణ రాష్ట్ర ఏర్పాటును కోరుకుంటున్నాయని చెప్పారు. తెలంగాణ రాష్ట్ర ఏర్పాటు తప్ప మరేదీ తెలంగాణ ప్రజలకు అంగీకారం కాదని అన్నారు. వాస్తవాలను పరిగణనలోకి తీసుకుని తెలంగాణ ప్రజల నిర్ణయాన్ని ప్రకటించాల్సి ఉండిందని వారు అభిప్రాయపడ్డారు. కమిటీ తెలంగాణ ప్రజలను, వారి ఆకాంక్షను పూర్తిగా విస్మరించిందని, తద్వారా ప్రభుత్వాన్ని కూడా తప్పుదోవ పట్టించిందని వారన్నారు. అది కాలయాపన కమిటీ మాత్రమేనని, తెలంగాణ రాష్ట్ర ఏర్పాటు ప్రక్రియలో దానికి ఏ విధమైన విలువ లేదని విమర్శించారు.

ఉద్యోగాలు పోవడం, హైదరాబాదులో ఐటి పరిశ్రమ ప్రభావంపై చేసిన విశ్లేషణలు కమిటీ తీరు ఎంత తప్పుడు పద్ధతుల్లో సాగిందో తెలియజేస్తాయని వారు చెప్పారు. హైదరాబాదులో పరిశ్రమ పెరుగతోందనే విషయం ఐటి పరిశ్రమ నివేదికలు చూస్తే తెలుస్తుందని వారన్నారు. 2010 నవంబర్‌లో గూగుల్ చెప్పిన విషయాలు చూస్తే శ్రీకృష్ణ కమిటీ నివేదిక తప్పుల తడక అని తెలుస్తుందని వారన్నారు. తమకు తెలంగాణ రాష్ట్ర ఏర్పాటు తప్ప మరేదీ అంగీకారం కాదనే తెలంగాణ ప్రజల వెనక తాము ఉంటామని వారు స్పష్టం చేశఆరు.