భారత టాక్సీ డ్రైవర్‌పై ఆస్ట్రేలియాలో దాడి

By Pratap

Published: Friday, December 2, 2011, 16:33 [IST]

ఆస్ట్రేలియాలో గురువారం ఓ భారత టాక్సీ డ్రైవర్‌పై దాడి జరిగింది. నలుగురు దుండగులు అతని టర్బన్‌ను ఊడదీసి, పిడిగుద్దులు గుద్దారు. రవిషేర్ సింగ్ అనే ఆ టాక్సీ డ్రైవర్‌తో వారు వాదులాటకు దిగి, ఆ తర్వాత దాడి చేశారు. దాడి ఆరోపణలపై ఆ నలుగురిలో ముగ్గురు వ్యక్తులను అరెస్టు చేసినట్లు ది ఏజ్ పత్రిక రాసింది. వారు తన టాక్సీలో మెల్‌బోర్న్‌లోని మెంటోన్ హోటల్ వద్ద ఎక్కారని, చెల్సియా హోటల్‌కు వెళ్లాలని చెప్పారని సింగ్ చెప్పాడు. స్ప్రింగ్‌వాలే మలుపులోకి రాగానే వారు తనతో వాగ్వివాదానికి దిగారని, తాను టాక్సీ నుంచి దిగిపోయానని అతను చెప్పాడు.

ఆ నలుగురు వ్యక్తులు తన టర్బన్ పీకేసి, తనను కొట్టారని అతను చెప్పాడు. గత ఐదారేళ్లుగా భారతీయుల పట్ల ఇది జరుగుతోందని, దీన్ని అపడానికి ఏదో ఒకటి చేయాలని సింగ్ అన్నాడు. తాము కష్టపడి పనిచేస్తున్నామని, అలాంటప్పుడు తమ పట్ల అలా ప్రవర్తించడం సరి కాదని అతను అన్నాడు. విక్టోరియా పోలీసులు కేసు నమోదు చేసి దర్యాప్తు చేస్తున్నారు.

Published On December 2, 2011