బాలికను ముద్దాడినందుకు జైలు

ఓ బాలికను లైంగికంగా వేధించినందుకు దుబాయ్‌లో ఓ భారతీయ కార్మికుడికి ఆరు నెలల జైలు శిక్ష పడింది. నగరంలోని నైఫ్ ప్రాంతంలోని ఓ భవనం ఎలివేటర్‌పై వికె అనే భారతీయ కార్మికుడు 9 ఏళ్ల పాఠశాల బాలికను వేధించినట్లు ఆరోపణలు వచ్చాయి. బాలికకు ఇష్టం లేకుండా ఆ వ్యక్తి ఆమెను కౌగలించుకున్నాడు, ముద్దులు పెట్టాడు. బాలిక పెదవులపై తాను ముద్దు పెట్టుకున్నట్లు వికె కోర్టు ముందు అంగీకరించాడు. తనకు 18 ఏళ్ల క్రితం పెళ్లయిందని, అయినా తనకు పిల్లలు కలగలేదని, తనకు పిల్లలు లేరు కాబట్టి ప్రేమతో ఆ బాలికను ముద్దాడానని అతను చెప్పాడు.

తాను ఇంటికి తిరిగి వెళ్తుండగా ఆ వ్యక్తి అకస్మాత్తుగా ఎలివేటర్‌లోకి వచ్చి తలుపులను చేతులు, కాళ్లతో మూసేశాడని, తన చేయి పట్టుకుని లాగి ముద్దులు పెట్టాడని, తాను అరవడంతో అతను పారిపోయాడని ఆ బాలిక చెప్పింది. ఈ తీర్పుపై అపీల్ చేసుకోవడానికి భారతీయ వ్యక్తికి 15 రోజుల గడువును కోర్టు ఇచ్చింది.