చరిత్ర సృష్టించిన నిక్కీ హేలీ

దక్షిణకరోలినా గవర్నర్‌గా భారత సంతతికి చెందిన నిక్కీహేలీ ప్రమాణస్వీకారోత్సవం చూడముచ్చటగా జరిగింది. దక్షిణ కరోలినా ప్రపథమ మహిళా గవర్నరుగా అమెరికాలో మొట్టమొదటి శ్వేతజాతేతర గవర్నరుగా నిక్కీ చరిత్ర సృష్టించారు. అమెరికాలోని వివిధ ప్రాంతాల్లో ఉన్న భారత సంతతి అమెరికన్లు భారీ సంఖ్యలో బుధవారం జరిగిన నిక్కీ ప్రమాణస్వీకారోత్సవానికి తరలి వచ్చారు. అమెరికాలో భారత దౌత్యవేత్త మీరాశంకర్‌తో సహా పలువురు ప్రముఖులు హాజరైనారు. నిక్కీ విజయం యావత్‌ భారత దేశానికే అత్యంత గర్వకారణమని సంబరపడ్డారు.

తన భారతీయ మూలాలను.. తలిదండ్రులిచ్చిన సంస్కారం గురించి నిక్కీ తన ప్రసంగంలో పేర్కొన్నారు. పంజాబ్‌ నుంచి ఎప్పుడో ఇక్కడికి వచ్చి స్థిరపడిన సిక్కు కుటుంబం ఆమెది. పూర్తి పేరు నమ్రతా నిక్కీ రణధవా. దక్షిణ కరోలినాలోని కుగ్రామంలో నిక్కీ కుటుంబం స్థిరపడింది. అమెరికా తమ కుటుంబానికి ఎంతో ఇచ్చిందని, కొన్ని చేదుజ్ఞాపకాలూ ఉన్నాయని, ఇక్కడి వారికంటే భిన్నంగా కనపడే, మాట్లాడే వారు ఎదుర్కొనే సమస్యలే తమకూ ఎదురైనాయని నిక్కీ అన్నారు.