బాబా దీక్ష భగ్నంపై ఎన్నారైల నిరసన

అవినీతికి వ్యతిరేకంగా చేపట్టిన యోగా గురు రామ్‌దేవ్ దీక్షను ప్రభుత్వం భగ్నం చేయడంపై అమెరికాలోని ఎన్నారైలకు చెందిన పీపుల్ ఫర్ లోకసత్తా (పిఎఫ్ఎల్) ఆశ్చర్యం వ్యక్తం చేసింది. శాంతియుత నిరసనపై పోలీసులు దాడి చేయడంపై ప్రధాని డాక్టర్ మన్మోహన్ సింగ్ బాధ్యత వహించాలని ఆ సంస్థ ఒక ప్రకటనలో డిమాండ్ చేసింది. రామ్‌దేవ్ బాబాపై కాంగ్రెసు నాయకుడు దిగ్విజయ్ సింగ్ చేసిన వ్యాఖ్యలను కూడా సంస్థ ఖండించింది. పిఎఫ్ఎల్‌తో పాటు అమెరికాలోని భారత్ స్వాభిమాన్ పార్టీ ఆధ్వర్యంలో అమెరికాలోని వివిధ నగరాల్లో ర్యాలీలు, ఒక రోజు దీక్షలు సాగాయి.

మానవహక్కుల కాలరాసిన భారత్ లిబియా కన్నా భిన్నమైంది ఎలా అవుతుందని హైమా సాగి ప్రశ్నించారు. బాబాకు, ఆయన లక్షలాది భక్తులకే ఇటువంటి చేదు అనుభవం ఎదురైతే అవినీతికి వ్యతిరేకంగా పోరాడదలచిన సామాన్యుల పరిస్థితి ఏమిటని అడిగారు. శ్రీకాంత్ కొచ్చర్లకోట, అతని సహచరులు ఒక రోజు దీక్ష చేశారు. చేసిన తప్పుకు ప్రభుత్వం ఫలితం అనుభవిస్తుందని, అజ్ఞాత హీరోల, సమాచార హక్కు చట్టం కార్యకర్తల త్యాగాలు వృధా కాకూడదని పిఎఫ్ఎల్ అధ్యక్షుడు ప్రసన్న మేదా అన్నారు.

English summary

People for Loksatta (PFL), a vibrant political organization from USA, had expressed shock and dismay over the government’s high handedness in handling Baba Ramdev's fast.