మాస్కోలో శ్రీకృష్ణుడికి ఆలయం

రష్యా రాజధాని మాస్కోలో ఇస్కాన్ శ్రీకృష్ణుడి ఆలయం నిర్మించుకోవడానికి స్థానిక ప్రభుత్వం స్థలం కేటాయించింది. ఆలయ నిర్మాణం కోసం మాస్కో శివారు ప్రాంతంలో ఐదు ఎకరాల స్థలాన్ని వారు సేకరించారు. రష్యాలోని ఇస్కాన్ స్వామి అయిన భక్తి విజ్ఞాన గోస్వామి ఇండియా వచ్చిన సందర్భంగా ఈ విషయాలు వెల్లడించారు. ప్రస్తుతం ఇస్కాన్ కార్యకలాపాలను దవేదిక్‌సెంటర్‌లో నిర్వహిస్తున్నారు. ఓ అపార్ట్‌మెంట్ నిర్మాణానికి అడ్డు వచ్చిందని అప్పటి దేవాలయాన్ని 2004లో ప్రభుత్వం కూలగొట్టిందని వివరించారు. కూలగొట్టిన దేవాలయానికి ప్రత్యామ్నాయంగా ఓ భవనాన్ని మాస్కో అధికార యంత్రాంగం ఇస్కాన్‌కు ఇచ్చిందని ఆయన గుర్తు చేశారు. రష్యాలో ఇస్కాన్ ఘనమైన చరిత్ర కలిగిఉందని తెలిపారు. ప్రస్తుతం సుమారు 50వేల మంది ఇస్కాన్ సభ్యులున్నట్లు చెప్పారు. కృష్ణాష్టమి వంటి పర్వదినాల్లో 10వేల మంది భక్తులు ఆలయానికి వస్తుంటారన్నారు. వీరిలో అత్యధికులు రష్యన్లేనని ఆయన వెల్లడించారు.

కొత్త ఆలయానికి ఇచ్చే స్థలం విషయంపై మాస్కో మేయర్‌కు, ఢిల్లీ ముఖ్యమంత్రికి మధ్య 2006లో ఓ ఉమ్మడి అవగాహన పత్రంపై సంతకాలు చేశారని గోస్వామి వెల్లడించారు. రష్యాలో ఇస్కాన్ సేవలను అభినందిస్తూ భారత రాష్ట్రపతి ప్రతిభాసింగ్ పాటిల్ గతనెలలో ఇస్కాన్‌కు ఓ లేఖ రాసిన సంగతి తెలిసిందే. కాగా, రష్యాలోని మరో నగరంలో భగవద్గీతను నిషేధించాలని న్యాయపోరాటం జరుగుతుంటే, మాస్కోలో ఆలయ నిర్మాణానికి ప్రభుత్వం సహాయం చేయడం భారతీయులకు విచిత్రానుభవమే. టోంస్క్ నగరంలో భగవద్గీతపై దాఖలైన పిటిషన్ విచారణ ఈ నెల 28న జరగనున్న నేపథ్యంలో మాస్కోలో ఇస్కాన్‌కు స్థలం కేటాయించడం గమనించదగిన విషయం.

English summary

Local Government in Moscow has helped to construct temple for Sri Krishna.