భారతీయ టెక్కీలకు స్పీడ్‌గా గ్రీన్ కార్డులు

భారతీయ టెక్కీలకు సంతోషం కలిగించే చర్యను అమెరికా చేపట్టింది. నైపుణ్యం గల ఇండియా, చైనీయులకు గ్రీన్ కార్డులను వేగంగా ఇచ్చేందుకు వీలుగా అమెరికా ప్రతినిధుల సభ వీసా వ్యవస్థను మారుస్తూ బిల్లును ఆమోదించింది. ఈ బిల్లు సెనేట్‌లో కూడా వేగంగా ఆమోదం పొందుతుందని భావిస్తున్నారు. యేటా అమెరికా విదేశాంగ శాఖ ఆమోదించిన మొత్తం ఉపాధి ఆధారిత గ్రీన్ కార్డుల్లో ప్రతి దేశానికి ఇచ్చే గ్రీన్ కార్డుల సంఖ్య ఏడు శాతానికి మించకుండా చూసేది. గ్రీన్ కార్డు వల్ల శాశ్వత నివాసిత పౌరులుగా గుర్తింపు పొందుతారు. ఆ నిబంధన వల్ల తగు దరఖాస్తులు రాని దేశాలకు చెందినవారు సులభంగా గ్రీన్ కార్డులు పొందడానికి వీలయ్యేది. కంపెనీలకు అవసరమైన విదేశీ టెక్కీలు పెద్ద దేశాల నుంచి రావడానికి ఆటంకంగా ఉండేది. భారతదేశం నుంచి వెళ్లినవారు గ్రీన్ కార్డు కోసం పదేళ్లు కూడా నిరీక్షించాల్సి వచ్చేది.

ప్రస్తుత సవరణ వల్ల మొదటి వచ్చినవారికి మొదట అనే విధానం వల్ల భారతదేశం టెక్కీ వర్కర్లకు లాభం చేకూరే అవకాశం ఉంది. దేశాలను పరిగణనలోకి తీసుకుని ఉపాధి ఆధారిత వీసాలకు పరిమితులు విధించడం వల్ల ఫలితం లేదని, నైపుణ్యం గల వర్కర్లు ఇండియా నుంచో బ్రెజిల్ నుంచో మరెక్కడి నుంచి వచ్చినా ఫరవా లేదని ఛాఫెట్జ్ ఓ ప్రకటనలో అన్నారు. ఇతర సవరణలు కూడా పెద్ద సంఖ్యలో అమెరికాకు వలస పోతున్న భారతీయులకు, చైనీయులకు లాభం చేకూర్చే విధంగా ఉన్నాయి.

English summary

In a move that may allow more highly skilled immigrants from India and China to obtain the so-called green cards faster, the US House of Representatives has passed a bill modifying the visa system.