ఆత్మహత్యలు వద్దని ఎన్నారైల వినతి

By Pratap

Published: Tuesday, March 27, 2012, 11:19 [IST]

తెలంగాణ కోసం ఆత్మహత్యలు చేసుకోవద్దని ఎన్నారైలు తెలంగాణ యువకులకు విజ్ఞప్తి చేశారు. బోజ్యా నాయక్ ఆత్మహత్య నేపథ్యంలో తెలంగాణ డెవలప్‌మెంట్ ఫోరం (టిడిఎఫ్) యుకె, ఐరోపా విభాగాలు ఆ విజ్ఞప్తి చేశాయి. తెలంగాణ రాష్ట్ర సాధన కోసం ప్రజాస్వామ్య పద్ధతుల్లో, శాంతియుతంగా పోరాటం చేయాలని టిడిఎఫ్ యుకె, ఐరోపా విభాగాలు తెలంగాణ విద్యార్థులకు, యువతకు విజ్ఞప్తి చేశాయి. ఈ మేరకు మీడియా, పిఆర్ కార్యదర్శి నాగేందర్ చిందం ఓ ప్రటన విడుదల చేశారు.

విశ్వాసం కోల్పోవద్దని ఆయన తెలంగాణ యువతను కోరారు. జీవితం అత్యంత విలువైందని, తెలంగాణ రాష్ట్ర ఏర్పాటు కలను సాకారం చేసుకునేందుకు, దాన్ని కళ్లారా చూసేందుకు మనం జీవించి ఉండాలని ఆయన అన్నారు. యువత బంగారు భవిష్యత్తు కోసం తెలంగాణ పెద్దలు, మేధావులు, రాజకీయనాయకులు పోరాడుతున్నట్లు తెలిపారు. ప్రజాస్వామికమైన, నిజాయితీతో కూడిన న్యాయబద్దమైన డిమాండ్ అయినందున తెలంగాణ రాష్ట్ర ఏర్పడి తీరుతుందని ఆయన అన్నారు. ఎవరితోనైనా మాట్లాడాలని అనుకుంటే విద్యార్థులు, యువకులు ఫేస్‌బుక్, ట్విట్టర్ తదితర సామాజిక సైట్ల ద్వారా టిడిఎఫ్ సభ్యులతో మాట్లాడవచ్చునని చెప్పారు.

Published On March 27, 2012