భాస్కరుడి గుట్టు విప్పిన టెలిస్కోప్.. ఉపరితలంపై మునుపెన్నడూ చూడని వింత!
సూర్యుడిపై నిరంతరం ఏదో ఒక వింత జరుగుతూనే ఉంటుంది. కానీ, ఈసారి శాస్త్రవేత్తలు చూసిన దృశ్యం మాత్రం వారిని అవాక్కయ్యేలా చేసింది. ఇప్పటివరకు సూర్యుడికి సంబంధించి చూసిన చిత్రాలన్నింటికంటే ఎంతో స్పష్టమైన ఇమేజ్లను పరిశోధకులు తీయగలిగారు.
ఇందులో మునుపెన్నడూ చూడని అతి చిన్న ప్లాస్మా సుడిగుండాలు సూర్యుడి ఉపరితలంపై స్పష్టంగా కనిపించాయి. హవాయిలోని ప్రసిద్ధ 'డేనియల్ కే. ఇనౌయే సోలార్ టెలిస్కోప్' ద్వారా లభించిన ఈ చిత్రాలు విశ్వంలో మనకు అత్యంత సమీపంలో ఉన్న నక్షత్రం గురించి సరికొత్త విషయాలను వెల్లడిస్తున్నాయి.
ఏమిటీ ప్లాస్మా సుడిగుండాలు?
విశ్వంలో ప్లాస్మా ప్రవాహాలు వేర్వేరు వేగాలతో పక్కపక్కనే ప్రయాణించినప్పుడు ఇలాంటి చక్రం లాంటి సుడిగుండాల ఆకారాలు ఏర్పడతాయి. వీటిని సాంకేతిక పరిభాషలో 'కెల్విన్-హెల్మ్హోల్ట్జ్ ఆటంకాలు' అంటారు. భూమి వాతావరణంలో, అలాగే జూపిటర్ గ్రహంపై ఇలాంటి ప్రక్రియలను మనం ఇదివరకు చూశాం. అయితే, స్వయంగా భాస్కరుడి ఉపరితలంపై నేరుగా వీటిని గమనించడం మాత్రం చరిత్రలో ఇదే తొలిసారి కావడం విశేషం.
చూడటానికి చిన్నవే.. చేసే వినాశనం పెద్దదే!
ఈ టెలిస్కోప్ సూర్యుడి ఉపరితలంపై కేవలం 20 కిలోమీటర్ల పరిమాణంలో ఉన్న అతి చిన్న ప్లాస్మా సుడిగుండాలను కూడా స్పష్టంగా రికార్డు చేసింది. ఇవి సూర్యుడిపై ఉండే సన్స్పాట్స్ సమీపంలో ఏర్పడుతున్నాయి. అక్కడి శక్తివంతమైన అయస్కాంత క్షేత్రాలు, వేగంగా ప్రవహించే ప్లాస్మా ప్రవాహాలతో కలవడం వల్ల ఇవి రూపొందుతాయి. ఇవి చిన్నవిగా అనిపించినప్పటికీ, సూర్యుడి అంతర్భాగంలో దాగిన భారీ శక్తిని బయటకు విడుదల చేయడంలో ప్రధాన పాత్ర పోషిస్తాయని శాస్త్రవేత్తలు అంచనా వేస్తున్నారు.
మన నిత్య జీవితంపై ప్రభావం ఎంత?
సూర్యుడి నుంచి అకస్మాత్తుగా ఎగసిపడే జ్వాలలు, ప్లాస్మా తుఫానుల వెనుక ఈ సుడిగుండాల హస్తం ఉందనేది పరిశోధకుల వాదన. ఈ ప్రక్రియను పూర్తిగా అర్థం చేసుకోగలిగితే, అంతరిక్షంలో వచ్చే 'స్పేస్ వెదర్' ను ముందే ఊహించడం సాధ్యమవుతుంది. దీనివల్ల మన శాటిలైట్లు, జీపీఎస్ వ్యవస్థలు, రేడియో సమాచార సాంకేతికత, విద్యుత్ గ్రిడ్లకు సౌర తుఫానుల వల్ల కలిగే ముప్పును ముందుగానే నివారించే అవకాశం లభిస్తుంది.
దశాబ్దాల నాటి వింత రహస్యానికి త్వరలోనే చిక్కుముడి?
ఖగోళ శాస్త్రంలో ఏళ్ల తరబడి శాస్త్రవేత్తలను వేధిస్తున్న ఒక పెద్ద ప్రశ్న ఉంది. సూర్యుడి ఉపరితలం కంటే, దాని బయటి వాతావరణ పొర అయిన 'కరోనా' చాలా రెట్లు ఎక్కువ వేడిగా ఉంటుంది. అసలు ఉపరితలం కంటే బయటి పొర అంత వేడిగా ఎందుకు ఉందో ఇప్పటివరకు స్పష్టమైన ఆధారం లేదు.
అయితే ఇప్పుడు దొరికిన ఈ ప్లాస్మా సుడిగుండాలే క్రింది భాగం నుంచి పైనున్న కరోనా పొరకు శక్తిని సరఫరా చేస్తున్నాయనే బలమైన భావన వ్యక్తమవుతోంది. ఈ కొత్త ఆవిష్కరణ సూర్యుడి అంతరంగాన్ని లోతుగా అర్థం చేసుకోవడానికి ఒక కొత్త ద్వారాన్ని తెరిచింది.
Click it and Unblock the Notifications
Sign in with Google