వణికిస్తున్న చలి.. భారీగా పడిపోయిన ఉష్ణోగ్రతలు!
ఉత్తరాదిని వణుకిస్తున్న మంచు గాలులు తెలుగు నేలకేసి వడివడిగా అడుగులు వేస్తున్నాయి. ఒకవైపు కాశ్మీర్ లోయ మంచు దుప్పటి కప్పుకుంటూ చినుకుల జల్లుల్లో తడుస్తుంటే, మరోవైపు కిందనున్న బంగాళాఖాతం నిశ్శబ్దంగా ఒక కొత్త తుఫాను కుట్రకు తెరలేపుతోంది. వాతావరణంలో చోటుచేసుకుంటున్న ఈ ఊహించని మార్పులు ఒకేసారి దేశాన్ని రెండు రకాల వాతావరణ పరిస్థితుల్లోకి నెట్టేస్తున్నాయి. ఉత్తరాన చలి పులి పంజా విసురుతుంటే, దక్షిణాదిపై వర్షపు మేఘాలు దాడికి సిద్ధమవుతున్నాయి.
హిమాలయాల్లో మంచు వర్షం.. మైదానాల్లో చలి గాలులు
పశ్చిమ దిశ నుంచి వీస్తున్న బలమైన గాలుల ప్రభావంతో జమ్మూ కాశ్మీర్, లడఖ్ ప్రాంతాల్లో ఉష్ణోగ్రతలు ఒక్కసారిగా పడిపోయాయి. పర్వత శ్రేణులు వరుసగా మంచు కొండలుగా మారుతుండగా, అక్కడక్కడా ఉరుములు, మెరుపులతో కూడిన భారీ వర్షాలు పడుతున్నాయి. హిమాచల్ ప్రదేశ్, ఉత్తరాఖండ్ రాష్ట్రాలోని పర్యాటక ప్రాంతాల్లో పొగమంచు మేఘాలు అలుముకున్నాయి. పర్వతాలపై కురుస్తున్న ఈ మంచు తుఫాను ప్రభావం పంజాబ్ మైదానాల మీదుగా వీస్తూ పరిసర ప్రాంతాలను చల్లబరుస్తోంది.
దేశ రాజధానిలో చలిపులి
ఈ గాలుల తాకిడికి ఢిల్లీ వాతావరణం రూపురేఖలు మారిపోయాయి. ఉదయమే లేవగానే దట్టమైన పొగమంచు పలకరిస్తుండగా, పగటిపూట కూడా సూర్యుడి ప్రతాపం తగ్గింది. అక్కడ రాత్రి ఉష్ణోగ్రతలు 15 డిగ్రీల కనిష్ఠ స్థాయికి పడిపోవడంతో హస్తిన వాసులు ఉన్ని దుస్తులు బయటకు తీస్తున్నారు. రాబోయే రెండు మూడు రోజుల్లో చలి తీవ్రత మరింత పెరిగే అవకాశం ఉందని తెలుస్తోంది.
బంగాళాఖాతంలో కదులుతున్న ద్రోణి.. దక్షిణాదికి వర్ష సూచన
ఉత్తరాది కథ ఇలా ఉంటే, దక్షిణాదికి మరో కొత్త గండం పొంచి ఉందనే సంకేతాలు వెలువడుతున్నాయి. దక్షిణ అందమాన్ సముద్రంలో నిశ్శబ్దంగా మొదలైన అల్పపీడన గాలి తరంగాలు క్రమంగా బలంగా మారుతున్నాయి. ఇది వారాంతానికి మరింత తీవ్రరూపం దాల్చి వాయుగుండంగా మారే సూచనలు కనిపిస్తున్నాయి. దీని ప్రభావంతో తమిళనాడు, పుదుచ్చేరి, కేరళతో పాటు పరిసర ప్రాంతాల్లో కోస్తా తీరం వెంట వర్షపు మేఘాలు కమ్ముకునే అవకాశం ఉంది.
ఈశాన్య రుతుపవనాల జోరు
సాధారణంగా దేశానికి ఎక్కువ వర్షపాతం ఇచ్చే నైరుతి రుతుపవనాలు వీడ్కోలు పలికిన తర్వాత, తమిళనాడు సహా దక్షిణాదికి ఈశాన్య రుతుపవనాలే ప్రధాన ఆధారం. ఇప్పుడు బంగాళాఖాతంలో తయారవుతున్న ఈ కొత్త వ్యవస్థ ఈశాన్య రుతుపవనాలకు మరింత బలాన్నిస్తోంది. దీనివల్ల రాబోయే రోజుల్లో తీర ప్రాంతాల్లో భారీ వర్షాలు కురిసే అవకాశం ఉందని వాతావరణ హెచ్చరికలు చెబుతున్నాయి. ఒకేసారి ఉత్తరాన మంచు ముప్పు, దక్షిణా న వర్షపు హెచ్చరికలతో రాబోయే రోజులు మరింత కీలకంగా మారనున్నాయి.
Click it and Unblock the Notifications
Sign in with Google
