మగతనానికి దివ్యౌషధం? ఆసియా దేశాల్లో పిచ్చిపిచ్చిగా తాగే డ్రింక్!
గ్లాసు సీసా.. అందులో చుట్టచుట్టుకుని పడుకున్న ఒక విషసర్పం.. ఆ పైనుంచి నింపిన ద్రవం! చూస్తేనే ఒళ్లు గగుర్పాటుకు గురయ్యే ఈ దృశ్యం ఏదో హర్రర్ సినిమాలోది కాదు. ఆగ్నేయాసియా దేశాల్లోని నైట్ మార్కెట్లకు వెళ్తే షాపుల్లో వరుసగా కనిపించే అతి సాదాసీదా దృశ్యం. దీని పేరు 'స్నేక్ వైన్' (Snake Wine). సీసాలో కొండచిలువలు, నాగుపాములను వేసి తయారుచేసే ఈ వైన్, అక్కడ అత్యంత ప్రజాదరణ పొందిన మద్యం. ప్రాచీన కాలం నుంచి వస్తున్న ఈ సాంప్రదాయ పానీయం ఆసియా సంస్కృతిలో ఒక భాగమైపోయింది.
ఈ విచిత్రమైన అలవాటు నిన్నమొన్నటిది కాదు. దాదాపు 2,000 సంవత్సరాల క్రితం చైనాలోని 'వెస్ట్రన్ జౌ' రాజవంశం కాలంలోనే ఈ స్నేక్ వైన్ను ఉపయోగించేవారని చరిత్ర చెబుతోంది. ఆ రోజుల్లో ఇది కేవలం రాజులు, రాజకుటుంబీకులు తాగే ప్రత్యేక ఆరోగ్యం అమృతంగా ఉండేది. కాలక్రమేణా చైనా, వియత్నాం, లావోస్, థాయ్లాండ్ వంటి దేశాల్లోని సామాన్యుల ఇళ్లకూ పాకింది. అక్కడి గ్రామీణ ప్రాంతాల్లో ఇంటికి వచ్చిన అతిథులకు గౌరవసూచకంగా ఈ వైన్ను అందించడం ఒక సాంప్రదాయంగా వస్తోంది.
సీసాలో పామును పెట్టి వైన్ ఎలా తయారు చేస్తారో తెలుసా?
ఈ వైన్ తయారీ విధానం చాలా భిన్నంగా ఉంటుంది. సీసాలో విషసర్పంతో పాటు తేళ్లు, గిన్సెంగ్ వృక్ష వేళ్లు, స్థానిక మూలికలను వేస్తారు. ఆ తర్వాత ఎక్కువ ఘాటుండే రైస్ వైన్ లేదా ధాన్యాల ఆల్కహాల్ను ఆ సీసాలో నింపి కొన్ని నెలల పాటు ఊరబెడతారు. "పాము విషం ఉంటే మనుషులు చనిపోరారా?" అనే అనుమానం అందరికీ రావచ్చు. కానీ, వైన్లో ఉండే ఆల్కహాల్ ఆ పాము విషంలో ఉండే విషపూరిత ప్రోటీన్లను పూర్తిగా విచ్ఛిన్నం చేసి, దాని ప్రభావాన్ని నశింపజేస్తుంది. దాంతో ఇది తాగడానికి సురక్షితంగా మారుతుంది. కొన్నిచోట్ల పామును వెంటనే కోసి, దాని తాజా రక్తాన్ని లేదా పిత్తరసాన్ని మద్యంలో కలిపి 'షాట్' రూపంలో ఇస్తుంటారు.
నొప్పులు మాయం.. మగతనానికి బలవర్ధకం!
పురాతన చైనీస్ సాంప్రదాయ వైద్యంలో పామును ఒక అద్భుతమైన మూలికగా పరిగణిస్తారు. పాము శరీరాన్ని వేడిస్తుందని, శరీరంలో ఉండే తడారిపోయే గుణాలను పోగొడుతుందని నమ్ముతారు. కీళ్ల నొప్పులు, ఆర్థరైటిస్ సమస్యలతో బాధపడేవారు, రక్తాభివృద్ధికి, నిరంతరం అలసటగా అనిపించే వారు ఈ వైన్ తాగితే మంచి ఉపశమనం లభిస్తుందని నమ్ముతారు. అంతేకాకుండా, పాముల్లో ఉండే విపరీతమైన శారీరక శక్తి, దమ్ము-ధైర్యం ఈ వైన్ తాగడం ద్వారా మనుషులకు వస్తాయని, ముఖ్యంగా పురుషుల్లో లైంగిక సామర్థ్యాన్ని పెంచేందుకు ఇది దివ్యౌషధమని స్థానికుల గట్టి నమ్మకం.
టూరిస్టులకు మైండ్ బ్లాకింగ్ స్వెనిర్!
వైద్య ప్రయోజనాల మాటేమో కానీ, విదేశాల నుంచి వచ్చే పర్యాటకులకు మాత్రం ఇది ఒక అద్భుతమైన గిఫ్ట్ వస్తువుగా మారింది. కిక్కుతో పాటు విజువల్ షాక్ ఇచ్చే ఈ బాటిళ్లను టూరిస్టులు విదేశాలకు తీసుకెళ్లడానికి తెగ ఆసక్తి చూపిస్తుంటారు. అందుకే నైట్ మార్కెట్లలో చిన్న చిన్న బాటిళ్లలో కూడా ఈ స్నేక్ వైన్ను విక్రయిస్తుంటారు. ఏది ఏమైనా, సీసాలో పామును చూస్తూ గ్లాసు ఖాళీ చేయడం మాత్రం ధైర్యవంతులకే సాధ్యం!
Click it and Unblock the Notifications
Sign in with Google