కుప్పకూలిన ఆస్ట్రేలియా బ్యాటింగ్ ఆర్డర్: రెండో టెస్ట్ పైనా బంగ్లాదేశ్ గట్టి పట్టు
బంగ్లాదేశ్తో జరుగుతున్న రెండో టెస్టులో ఆస్ట్రేలియా బ్యాటింగ్ లో ఫ్లాఫ్ షో కనబరిచింది. బంగ్లాదేశ్ స్పీడ్స్టర్ షరీఫుల్ ఇస్లాం నిప్పులు చెరిగే బౌలింగ్తో ఆసీస్ బ్యాటింగ్ లైనప్ను కోలుకోలేని దెబ్బతీశాడు. మొదటి రోజు ఆట ముగిసే సమయానికి ఆస్ట్రేలియా తన మొదటి ఇన్నింగ్స్లో 8 వికెట్ల నష్టానికి 165 పరుగులు చేసింది. ఇప్పటికే 101 పరుగుల ఆధిక్యాన్ని సంపాదించింది. కామెరాన్ గ్రీన్ ఒంటరి పోరాటం చేస్తోన్నాడు. మొదటి రోజు 51 పరుగులతో నాటౌట్ గా నిలిచాడు.
ఈ మ్యాచ్లో మొదట బ్యాటింగ్ చేసిన బంగ్లాదేశ్ జట్టు ఆస్ట్రేలియా బౌలర్ల ధాటికి 64 పరుగులకే కుప్పకూలింది. బంగ్లాదేశ్ ఆలౌట్ కావడంతో ఆస్ట్రేలియాకు మొదటి ఇన్నింగ్స్లో భారీ స్కోర్ సాధించే అవకాశం లభించింది గానీ దాన్ని సద్వినియోగం చేసుకోలేకకపోయింది. బంగ్లాదేశ్ తరహాలోనే ఆస్ట్రేలియా కూడా వరుస వికెట్లు కోల్పోయి తీవ్ర ఇబ్బందుల్లో పడింది. పరుగుల వరద పారించే ఆసీస్.. హోమ్ గ్రౌండ్లో విఫలమైంది. క్రమం తప్పకుండా వికెట్లు కోల్పోయింది.
22 పరుగులకు రెన్ షా రూపంలో మొదటి వికెట్ కోల్పోయిన తర్వాత ఏ దశలో కూడా ఆస్ట్రేలియా కోలుకోలేకపోయింది. జట్టు స్కోర్ 145 పరుగులకు అయిదు వికెట్లు కోల్పోయిన ఆ జట్టు.. 148 పరుగులకు చేరుకునేటప్పటికీ ఎనిమిది వికెట్లను నష్టపోయిందంటే బంగ్లాదేశ్ బౌలింగ్ ఎంత పటిష్టంగా ఉందో అర్థం చేసుకోవచ్చు. టాప్ ఆర్డర్ లో స్టీవెన్ స్మిత్- 42, కామెరాన్ గ్రీన్ - 51 (నాటౌట్) ఆదుకోకపోయివుంటే మరింత దిగజారి ఉండేది.
భారీ ఆధిక్యం సాధించాలనే లక్ష్యంతో ఇన్నింగ్స్ ప్రారంభించిన ఆస్ట్రేలియాకు ఆరంభంలోనే గట్టి షాక్లు తగిలాయి. ఓపెనర్ ట్రావిస్ హెడ్ 22, రెన్ షా 8 పరుగులు చేసి ఔటయ్యారు. స్టార్ బ్యాటర్ మార్నస్ లాబుషేన్ 4 పరుగులు మాత్రమే చేసి షరీఫుల్ బౌలింగ్లో క్లీన్ బౌల్డ్ అయ్యాడు. దీంతో 39 పరుగులకే మూడు కీలక వికెట్లు కోల్పోయింది ఆస్ట్రేలియా. ఈ దశలో స్టీవ్ స్మిత్, కామెరాన్ గ్రీన్ కలిసి ఇన్నింగ్స్ను చక్కదిద్దే బాధ్యతను భుజాన వేసుకున్నారు.
స్మిత్ అత్యంత ఓపికగా ఆడుతూ 74 బంతుల్లో 42 పరుగులు చేశాడు. కుదురుకున్న తరుణంలో స్మిత్ను షరీఫుల్ ఎల్బీడబ్ల్యూగా వెనక్కి పంపాడు. ఆ తర్వాత వచ్చిన అలెక్స్ క్యారీ అయిదు పరుగులే చేయగా.. బ్యూ వెబ్స్టర్, కెప్టెన్ పాట్ కమిన్స్ డకౌట్గా వెనుతిరిగారు. మిచెల్ స్టార్క్ కూడా ఒక పరుగుకే పెవిలియన్ చేరాడు. ఒకవైపు వికెట్లు పడుతున్నా కామెరాన్ గ్రీన్ పట్టుదలతో బ్యాటింగ్ చేశాడు. 81 బంతులు ఎదుర్కొన్న గ్రీన్ 8 ఫోర్లతో 51 పరుగులు చేసి అజేయంగా నిలిచాడు. లోయర్ ఆర్డర్లో నాథన్ లయన్ 10 పరుగులతో ఆడుతున్నాడు.
బంగ్లాదేశ్ బౌలర్లలో షరీఫుల్ ఇస్లాం అద్భుతమైన స్పెల్తో ఆకట్టుకున్నాడు. స్వింగ్, వేగంతో ఆస్ట్రేలియా బ్యాటింగ్ను శాసించాడు. స్మిత్, హెడ్, లాబుషేన్, వెబ్స్టర్, కమిన్స్, స్టార్క్ వంటి కీలక వికెట్లను పడగొట్టి మొత్తం 6 వికెట్లు తన ఖాతాలో వేసుకున్నాడు. మిగిలిన బౌలర్లలో టాస్కిన్ అహ్మద్, మెహిదీ హసన్ మిరాజ్ చెరో వికెట్ సాధించి అతనికి సహకరించారు. ప్రస్తుతం ఆస్ట్రేలియా 101 పరుగుల ముందంజలో ఉంది.
Click it and Unblock the Notifications
Sign in with Google