140 కోట్ల మంది కలలు ఛిద్రం.. ప్రపంచ కప్ నుంచి భారత్ అవుట్!

భారత క్రీడా లోకంలో ఓ వైపు క్రికెట్ ప్రపంచకప్ ఫైనల్ సందడి నెలకొంటే.. మరోవైపు బాక్సింగ్ రంగంలో ఆందోళన నెలకొంది. జూనియర్ బాక్సింగ్ ప్రపంచ ఛాంపియన్‌షిప్‌లో పతకాలు సాధించి దేశ కీర్తిని చాటాలనుకున్న 10 మంది యువ బాక్సర్ల కలలు చిధ్రమయ్యాయి. మధ్యప్రాచ్యంలో నెలకొన్న యుద్ధ వాతావరణం కారణంగా ఒక్క మ్యాచ్ కూడా ఆడకుండానే భారత బాక్సింగ్ జట్టు ఈ మెగా టోర్నీ నుంచి తప్పుకోవాల్సి వచ్చింది. ఇరాన్-ఇజ్రాయెల్ మధ్య జరుగుతున్న పోరు.. క్రీడాకారుల కెరీర్‌పై పెను ప్రభావం చూపడం తీవ్ర విచారకరం.

పాస్‌పోర్ట్ సమస్యే శాపమైంది!
మోంటెనెగ్రోలోని బుడ్వా నగరంలో మార్చి 3 నుంచి 11 వరకు జరగాల్సిన వరల్డ్ బాక్సింగ్ ఛాంపియన్‌షిప్‌కు భారత జట్టు అన్ని రకాలుగా సిద్ధమైంది. అయితే టోర్నీకి వెళ్లడానికి సరిగ్గా సమయానికి క్రీడాకారుల పాస్‌పోర్టులు చేతికి అందకపోవడమే ఈ విపత్తుకు కారణమైంది. వీసా స్టాంపింగ్ ప్రక్రియ కోసం యునైటెడ్ అరబ్ ఎమిరేట్స్ (యూఏఈ)కి పంపిన ఒరిజినల్ పాస్‌పోర్టులు, అక్కడి యుద్ధ ఉద్రిక్తతల వల్ల ఏర్పడిన లాజిస్టిక్ సమస్యలతో అక్కడే నిలిచిపోయాయి. దీనివల్ల జట్టు నిర్ణీత సమయానికి మోంటెనెగ్రోకు చేరుకోలేకపోయింది.

యూఏఈకి ఎందుకు పంపాల్సి వచ్చింది?
సాధారణంగా వీసా ప్రక్రియ స్వదేశంలోనే జరుగుతుంది, కానీ భారత్‌లో మోంటెనెగ్రోకు సంబంధించిన ఎంబసీ (దౌత్య కార్యాలయం) లేదు. దీంతో భారత బాక్సింగ్ ఫెడరేషన్, యూఏఈలో ఉన్న మోంటెనెగ్రో ఎంబసీ ద్వారా వీసాల కోసం దరఖాస్తు చేయాల్సి వచ్చింది. ఫిబ్రవరి 20నే వీసా స్టాంపింగ్ కోసం ఫిజికల్ పాస్‌పోర్టులను అక్కడికి పంపారు. సాధారణంగా రెండు మూడు రోజుల్లో పూర్తి కావాల్సిన ఈ ప్రక్రియ, యుద్ధం కారణంగా నెలకొన్న విమాన సర్వీసుల అంతరాయం, ఇతర భద్రతా కారణాల వల్ల నిలిచిపోయింది.

విఫలమైన దౌత్య ప్రయత్నాలు
వీసా ఆమోదం పొందినట్లు ఈమెయిల్ ద్వారా సమాచారం అందినప్పటికీ.. ఫిజికల్ పాస్‌పోర్టులు చేతిలో లేకుండా ప్రయాణించడం అంతర్జాతీయ నిబంధనల ప్రకారం అసాధ్యం. బాక్సింగ్ ఫెడరేషన్ అధికారులు నిరంతరం విదేశీ వ్యవహారాల మంత్రిత్వ శాఖ (MEA), ఎంబసీ అధికారులతో సంప్రదింపులు జరిపారు. విమాన టికెట్లు కూడా చివరి నిమిషం వరకు స్టాండ్‌బై మోడ్‌లో ఉంచారు. కానీ పాస్‌పోర్టులు భారత్‌కు చేరకపోవడంతో, చివరకు చేసేదేమీ లేక టోర్నీ నుంచి వైదొలుగుతున్నట్లు ప్రకటించాల్సి వచ్చింది.

ఆవేదనలో యువ క్రీడాకారులు
ఏడాది పొడవునా రక్తం ధారబోసి, కఠినమైన శిక్షణ పొందిన యువ బాక్సర్లు ఈ వార్తతో కుంగిపోయారు. తమ ప్రతిభను ప్రపంచ వేదికపై నిరూపించుకోవాలని ఆశించిన వారికి, తమ తప్పు లేకుండానే ఇలాంటి పరిస్థితి ఎదురవ్వడం జీర్ణించుకోలేకపోతున్నారు. అంతర్జాతీయ స్థాయిలో పతకాలు సాధించే సువర్ణావకాశాన్ని కోల్పోవడం వల్ల వారి ర్యాంకింగ్స్, కెరీర్ గ్రాఫ్‌పై కూడా ప్రభావం పడే అవకాశం ఉంది. యుద్ధాలు కేవలం సరిహద్దులకే పరిమితం కాకుండా, అమాయక క్రీడాకారుల ఆశయాలను కూడా ఎలా బలి తీసుకుంటాయో అనడానికి ఈ ఘటనే నిదర్శనం. భారత బాక్సర్ల ప్రపంచకప్ ప్రయాణం రింగులోకి చేరకముందే ముగిసిపోయింది. క్రీడా వ్యవస్థలో ఇలాంటి సాంకేతిక, దౌత్యపరమైన ఇబ్బందులు భవిష్యత్తులో పునరావృతం కాకుండా చూడాల్సిన బాధ్యత అధికారులపై ఉంది.

English summary

India's junior boxing team pulls out of the World Championship in Montenegro as passports get stuck in UAE due to Middle East tensions. A heartbreaking end for 10 boxers.