WPL 2026 మెగా వేలం నేడే: అందరి దృష్టి వీరిపైనే!

WPL 2026 Auction: మహిళా ప్రీమియర్ లీగ్(WPL 2026) 2026 సీజన్ కోసం నేడు దేశ రాజధాని ఢిల్లీలో మెగా వేలాన్ని నిర్వహించనున్నారు. ఈ వేలంలో మొత్తం రూ.41.10 కోట్ల బడ్జెట్‌తో లీగ్‌లోని 5 జట్లు 73 మంది ఆటగాళ్ల స్లాట్లను భర్తీ చేయనున్నాయి. దేశ విదేశాల నుంచి మొత్తం 277 మంది మహిళా క్రీడాకారులు తమ అదృష్టాన్ని పరీక్షించుకోవడానికి రిజిస్టర్ చేసుకున్నారు. కొత్త సీజన్‌కు ముందు అనేక జట్లు స్టార్ ఆటగాళ్లను విడుదల చేయడంతో.. వేలం టేబుల్ వద్ద ఆటగాళ్లను దక్కించుకునేందుకు జట్ల మధ్య తీవ్రమైన బిడ్డింగ్ పోరు జరగడం ఖాయమని కనిపిస్తోంది. ఈ వేలం ద్వారా ఏ జట్టు బలమైన జట్టును ఏర్పాటు చేసుకుంటుందనేది నేడు తేలిపోనుంది. ఈ మెగా వేలం మధ్యాహ్నం 3.30 గంటలకు ప్రారంభం కానుంది. ఈ వేలం స్టార్ స్పోర్ట్స్, జియో హాట్ స్టార్ వేదికగా ప్రత్యక్షప్రసారంలో వీక్షించవచ్చు.

జట్ల పర్స్ బ్యాలెన్స్, వ్యూహం
ఈ వేలంలో యూపీ వారియర్స్ అత్యంత ఎక్కువ డబ్బుతో దాదాపు రూ.14.5 కోట్లతో బరిలోకి దిగుతోంది. వారు అత్యధికంగా 17 స్లాట్లను భర్తీ చేయాల్సి ఉంది. ఇందులో 5 విదేశీ స్లాట్లు ఉన్నాయి. ఎక్కువ మంది ఆటగాళ్లను కొనాల్సిన అవసరం, వారి పర్స్‌లో ఉన్న భారీ మొత్తం యూపీ జట్టును వేలంలో కీలక పాత్ర పోషించేలా చేస్తుంది. వారి తర్వాత స్థానంలో రూ.9 కోట్లతో గుజరాత్ జెయింట్స్ నిలవగా.. వారు 16 స్లాట్లను భర్తీ చేయాలి. స్మృతి మంధాన సారథ్యంలోని రాయల్ ఛాలెంజర్స్ బెంగళూరు(ఆర్సీబీ) రూ.6.15 కోట్లతో 14 స్లాట్లను భర్తీ చేయాల్సి ఉండగా.. తక్కువ డబ్బు ఉన్నప్పటికీ ముంబై ఇండియన్స్ రూ.5.75 కోట్లతో 13 స్లాట్లను, ఢిల్లీ క్యాపిటల్స్ రూ.5.7 కోట్లతో 13 స్లాట్లను పూర్తి చేయాల్సి ఉంది. తక్కువ డబ్బు ఉన్న జట్లు తెలివైన, ఖచ్చితమైన బిడ్డింగ్‌లతో తమ స్క్వాడ్లను పటిష్టం చేసుకోవాల్సి ఉంటుంది.

ఆ ప్లేయర్లపై దృష్టి
ఈ మెగా వేలంలో దేశీయ, అంతర్జాతీయ స్టార్ ప్లేయర్లపై కోట్ల వర్షం కురిసే అవకాశం ఉంది.భారత జట్టు నుంచి ఆల్‌రౌండర్ దీప్తి శర్మ, పేస్ బౌలర్ రేణుకా సింగ్‌లపై అత్యధిక బిడ్డింగ్ ఉంటుందని అంచనా వేస్తున్నారు. విదేశీ ప్లేయర్లలో న్యూజిలాండ్‌కు చెందిన సోఫీ డివైన్, అమేలియా కెర్, ఇంగ్లాండ్‌కు చెందిన ఎక్లెస్టోన్, ఆస్ట్రేలియాకు చెందిన వికెట్ కీపర్ అలిసా హీలీ, మెగ్ లానింగ్, దక్షిణాఫ్రికాకు చెందిన లారా వోల్వార్డ్ వంటి స్టార్ ఆటగాళ్లు వేలంలో హాట్ ఫేవరెట్‌లుగా ఉన్నారు.

వీరితో పాటు క్రాంతి గౌడ్, శ్రీ చరణి, ఫోబి లీచ్‌ఫీల్డ్, హర్లీన్ డియోల్, ఆల్‌రౌండర్ స్నేహ్ రాణా వంటి ఇతర టాలెంటెడ్ ఆటగాళ్లను దక్కించుకోవడానికి కూడా అన్ని జట్లు పోటీ పడతాయి. ఈ మార్కీ ప్లేయర్‌లను తమ జట్టులో చేర్చుకోవడం ద్వారానే జట్లు తమ కూర్పును బలోపేతం చేసుకోగలుగుతాయి.

English summary

The WPL 2026 Mega Auction takes place today in Delhi with 5 teams competing for 73 slots and a total purse of ₹41.10 crore. UP Warriorz lead with the biggest purse as top Indian and overseas players.