చిరు రాజకీయంపై పెను సందేహాలు

హైదరాబాద్: చిరంజీవి రాజకీయాల్లో రాణించే విషయానికి సంబంధించి ఆయన శిబిరంలోనే అనేక సందేహాలు ఇప్పుడు నెలకొన్నాయి. రాష్ట్రంలో కాపు జనం ( కాపు, తెలగ, ఒంటరి, బలిజ, మున్నూరు కాపు, తూర్పు కాపు) 27 శాతం ఉన్నారని ప్రగాఢంగా నమ్మే కాపు నాయకులు చిరంజీవి రాజకీయాల్లో తమకు కొంత పాత్ర ఉంటుందని ఆశించారు. కానీ వారికి అక్కడ తగిన ఆదరణ దొరకకపోవడంతో తీవ్రంగా ఆవేదనకు గురవుతున్నారు.

చిరంజీవి శిబిరంలో సూడో కమ్యూనిస్టులు పాగా వేయడంతో నేడు అయోమయ పరిస్ధితి నెలకొంది. కులం కాకుండా మరో రకంగా ముందుకు రావాలని చిరంజీవికి సలహాలు అందుతున్నాయి. కానీ భారతదేశానికి సంబంధించినంత వరకు కులమే సామాజిక సత్యం. కమ్యూనిస్టులు కుల రహిత సమాజాన్ని కాంక్షించినా అది కొన్ని శతాబ్దాల వరకు సా ధ్యమయ్యే విషయం కాదు.

చిరంజీవికి ఆయన కులం ముద్ర పడినా పడక పోయినా రాష్ట రాజకీయాల్లో పెద్ద స్కోప్ ఉంది. ఆయన దానిని ఎంత బాగా ఉపయోగించుకుంటాడో అన్నది ఆయన ప్రజల్లోకి వెళ్ళిన తర్వాత కానీ తెలియదు. చిరంజీవి ధీరోదాత్తంగా పబ్లిక్ ప్రసంగాలు చేస్తే తప్ప ఆయనకు లాభం జరిగే అవకాశాలు కన్పించడం లేదు. తెగించిన రీతిలో కొదమ సింహంలా మాట్లాడితే తప్ప ఆయనను జనం అంగీకరించే పరిస్ధితులు కన్పించడం లేదు.