బాబే కాంగ్రెసు లక్ష్యం

రాష్ట్ర ముఖ్యమంత్రిని ఎంపిక చేసే విషయంలో తెలుగుదేశం పార్టీ అధ్యక్షుడు నారా చంద్రబాబు నాయుడిని ఎదుర్కునే సత్తానే ప్రధానంగా పరిగణనలోకి తీసుకునే అవకాశం ఉంది. తెలుగుదేశం పార్టీని, ఆ పార్టీ అధ్యక్షుడు నారా చంద్రబాబునాయుడిని రాజకీయంగా ఎదుర్కునే సత్తా ఉన్న నాయకుడే కాంగ్రెసు అధిష్ఠాన వర్గానికి ఇప్పుడు కావాల్సింది. 2014 ఎన్నికలను దృష్టిలో పెట్టుకుని దూరదృష్టితో ఆ ఎంపిక జరిగే అవకాశం ఉంది. ఇందుకు తగిన సమయం తీసుకోవడానికే తమకు అత్యంత విధేయుడైన కె. రోశయ్యను తాత్కాలికంగా ముఖ్యమంత్రి పీఠంపై కూర్చోబెట్టినట్లు చెబుతున్నారు. ప్రభుత్వ పాలనా యంత్రాంగాన్ని నడిపించడం పెద్ద సమస్య కాదని, రాజకీయంగా చంద్రబాబును, ఆయన లాబీని ఎదుర్కోవడం ముఖ్యమని భావిస్తున్నారు.

చంద్రబాబును, ఆయనకు మద్దతుగా నిలిచిన ఈనాడు, ఆంధ్రజ్యోతి దినపత్రికల యాజమాన్యాలను ఎదుర్కోవడంలో దివంగత నేత వైయస్ రాజశేఖర రెడ్డి ఎనలేని తెగువను ప్రదర్సించారు. ఇప్పటి వరకు కాంగ్రెసుకు అంతటి సామర్థ్యం, సాహసం కలిగిన నాయకుడు మర్రి చెన్నారెడ్డి మినహా ఎవరూ కనిపించలేదు. వైయస్ వారసత్వాన్ని వైయస్ జగన్మోహన్ రెడ్డి పూర్తిగా పుణికి పుచ్చుకున్నారని, వైయస్ లాగా చంద్రబాబును ఎదుర్కోవాలంటే వైయస్ జగన్ ను ముఖ్యమంత్రిని చేయడమే మంచిదనే వాదన బలంగానే వినిపిస్తోంది. అయితే కాంగ్రెసులోని అంతర్గత వైరుధ్యాలను ఆలోచించాల్సిన అగత్యంలో పార్టీ అధిష్ఠాన వర్గం పడింది. వైయస్ రాజశేఖర రెడ్డి తన విజయాల ద్వారా, ప్రజల్లోకి చొచ్చుకుపోవడం ద్వారా పార్టీలో తనకు మరొకరు పోటీ రాకుండా చూసుకున్నారు. రాజకీయంగా ఆయన ముందు కాంగ్రెసులో మరో నాయకుడు ధీటుగా నిలవలేకపోయాడు.

వైయస్ జగన్ విషయంలో అనుభవ రాహిత్యం, వయస్సు కూడా అడ్డంకిగా మారాయి. వైయస్ ఆత్మీయ మిత్రుడు కెవిపి రామచందర్ రావుపై నమ్మకంతో పార్టీ అధిష్ఠానవర్గం జగన్ కు ముఖ్యమంత్రి పదవిని కట్టబెట్టాల్సి ఉంటుంది. ఈ సమయంలో పార్టీలో విభేదాలు తలెత్తకుండా ఏ విధంగా వ్యవహరించలగలరనే సందేహం మిగిలే ఉంటుంది. కొత్త నేత ఎంపికపై ఇప్పుడే కసరత్తు చేయడం లేదని చెబుతున్నప్పటికీ కాంగ్రెసు అధిష్ఠానవర్గం సీరియస్ గానే ఆలోచిస్తున్నట్లు పరిణామాలు తెలియజేస్తున్నాయి.