పదవి అవసరమా?

చిరంజీవి నాయకత్వంలోని ప్రజారాజ్యం పార్టీ కార్యవర్గంలో ఆయన బావ మరిది, ప్రముఖ నిర్మాత అల్లు అరవింద్ కు స్థానం లేకపోవడం పట్ల కాస్తా ఆశ్చర్యమే వ్యక్తమవుతోంది. పార్టీ ఎన్నికల్లో నిరాశాపూరితమైన ఫలితాలు సాధించడంతో అల్లు అరవింద్ పై విమర్శల పరంపర మొదలైంది. చిరంజీవి సోదరులు పవన్ కళ్యాణ్, నాగబాబు కూడా పార్టీకి దూరమైనట్లు భావిస్తున్నారు. పార్టీ నాయకులు చాలా మంది అల్లు అరవింద్ పై ఆరోపణలు చేయడం ప్రారంభించారు. పార్టీ నుంచి వెళ్లిపోతూ నాయకులు చాలా మంది అల్లు అరవింద్ పై తమ ఆరోపణలను గురిపెట్టారు. అల్లు అరవింద్ ఏక పక్ష నిర్ణయాల వల్ల పార్టీ ఓడిపోయిందనే భావన బలంగా ఏర్పడింది. చిరంజీవి సొంత నిర్ణయాలు తీసుకోలేరని, అల్లు అరవింద్ చెప్పినట్లే నడుచుకుంటారని, దీని వల్ల పార్టీకి నష్టం జరుగుతుందని ప్రచారం మొదలైంది. ఇందులో నిజం లేకపోలేదు. ఈ స్థితిలో విమర్శలకు తావు ఇవ్వకూడదనే ఉద్దేశంతోనే అల్లు అరవింద్ ను పార్టీ కార్యవర్గంలోకి తీసుకోలేదని భావిస్తున్నారు.

మరో విషయం కూడా చర్చల్లో ఉంది. అల్లు అరవింద్ సినీ నిర్మాణంలో నిండా మునిగిపోయి ఉన్నారు. గజినీ హిందీ సినిమా, మగధీర సూపర్ హిట్ అల్లు అరవింద్ కు భారీగా లాభాలు తెచ్చిపెట్టాయని అంటున్నారు. దీంతో ఆయన సినిమా నిర్మాణాలపై మరింత దృష్టి కేంద్రీకరించాలని భావిస్తున్నట్లు సమాచారం. తన కుమారుడు అల్లు అర్జున్ తో కూడా ఒక భారీ చిత్రాన్ని నిర్మించడానికి సిద్దమవుతున్నట్లు చెబుతున్నారు. ఈ స్థితిలో పార్టీ కార్యకలాపాలపై దృష్టి పెట్టే సమయం దొరకదని, అందువల్లనే పార్టీ కార్యవర్గంలో ఆయన చేరలేదని అంటున్నారు. అయితే ప్రధాన కారణం మాత్రం విమర్శల నేపథ్యంలో పార్టీ పదవి తీసుకోకపోవడమే మేలని భావించడమని చెబుతున్నారు. పార్టీ పదవి లేనంత మాత్రాన అల్లు అరవింద్ ప్రాబల్యానికి లోటేమీ ఉండదని అందరికీ తెలిసిన విషయమే.

చిరంజీవి ప్రతి అడుగు కూడా అల్లు అరవింద్ మార్గదర్సకత్వంలోనే పడుతుందనే విషయం సర్వ విదితం. అందువల్ల అల్లు అరవింద్ అనుకున్న ప్రకారమే పార్టీ నడుస్తుందని, దానికి పదవి తీసుకోవాల్సిన అవసరం లేదని అనుకున్నట్లు తెలుస్తోంది. వచ్చే కాలంలో పార్టీలో పెద్దగా అల్లు అరవింద్ నిర్వర్తించాల్సిన పాత్ర కూడా పెద్గగా ఉండదు. మళ్లీ ఎన్నికలు వచ్చేనాటికి చక్రం తిప్పడానికి ఆయన ఎప్పుడూ సిద్ధంగానే ఉంటారని అంటున్నారు. తాను చిరంజీవిని కాపాడుకుంటూ వస్తున్నానని అల్లు అరవింద్ స్వయంగా తనపై విమర్శలు వచ్చినప్పుడు అన్నారు. అందువల్ల చిరంజీవి అడ్గుగా నిలబడడానికి ఆయనకు పదవే ఉండాల్సిన అవసరం లేదని అంటున్నారు.