జగన్ తగ్గినట్టేనా?

హైదరాబాద్: ఎనబై ఏళ్ళకు దగ్గర పడుతున్న రోశయ్యకు, నలభై ఏళ్ళ సమీపంలో ఉన్న వైఎస్ జగన్ కు ఇప్పుడు ప్రత్యక్ష యుద్ధం జరుగనుందా? రోశయ్యను ముఖ్యమంత్రిగా కొనసాగనివ్వరాదని జగన్ శిబిరం ఎన్నో పైఎత్తులకు సిద్ధమవుతోంది. కానీ జగన్ శాంతియుతంగా తన వర్గం వారిని సముదాయిస్తున్నట్టు తెలుస్తోంది. ముఖ్యమంత్రి పదవి కోసం మరో నాలుగున్నర ఏళ్ళు ఆగడానికి ఆయన మానసికంగా సిద్ధపడినట్టు కనిపిస్తోంది. కానీ ఆయన వంది మాగధులు మాత్రం తొందర పడుతున్నారు. వైఎస్ కాంగ్రెస్ పేరిట వేరు కుంపటి పెట్టి రోశయ్యను పదవి నుంచి తొలగించాలన్నది ఒక ఆలోచన. కానీ ఇప్పటి పరిస్ధితుల్లో అది ఆచరణ సాధ్యం కాదన్న విషయం కెవిపి రామచంద్రరావు వంటి వైఎస్ వీర విధేయులకు కూడా అర్ధమైపోయింది.

రోశయ్య నిన్న సోనియా గాంధీ చేసిన ప్రశంసతో ముఖ్యమంత్రిగా మరింత బలపడ్డారు. మంత్రి వర్గ పూర్ వ్యవస్ధీకరణకు కూడా సోనియా ఆయనకు గ్రీన్ సిగ్నల్ ఇచ్చినట్టు తెలుస్తోంది. అదే నిజమైతే రోశయ్య సిఎంగా పాతుకు పోయినట్టే. వైఎస్ జగన్ ను బహిరంగంగా సమర్ధించి, రోశయ్యను విమర్శించిన కొండా సురేఖ వంటి మంత్రుల గుండెల్లో నిన్నటి నుంచి రైళ్ళు పరుగెడుతున్నాయి. రోశయ్యనే ముఖ్యమంత్రిగా కొనసాగించాలన్న తన నిర్ణయాన్ని సోనియాగాంధీ ప్రధానికి, కాంగ్రెస్ రాష్ట్ర వ్యవహారాల ఇంచార్జి వీరప్ప మొయిలీకి తెలియజేసినట్టు సమాచారం. నిన్న కెవిపితో ప్రత్యేకంగా సమావేశమైన మొయిలీ అదే విషయాన్ని ఆయన చెవిలో వేసి తోందరపడవద్దని చెప్పినట్టు తెలుస్తోంది.

తండ్రి మరణానంతరం జగన్ వర్గం కొన్ని పొరపాట్లు చేసింది. జగన్ ఆ షాక్ నుంచి వెంటనే తేరుకుని కాంగ్రెస్ హైకమాండ్ తో మరీ ముఖ్యంగా సోనియాగాంధీతో తరచు కలుగజేసుకుని మాట్లాడుతూ, తన తండ్రి గారు మిగిల్చిపోయిన పనులను పూర్తి చేయడానికి తాను సిద్ధంగా ఉన్నానంటూ అసెర్టివ్ గా మాట్లాడి ఉంటే సీన్ మరో విధంగా ఉండేది. కానీ ఆయన దిగులుగా తోటకూర కాడలా ఒరిగిపోవడం హైకమాండ్ కు రాంగ్ సిగ్నల్స్ ను పంపింది.

రోశయ్య, జగన్ ల మధ్య కాంగ్రెస్ పార్టీ చీలిపోతే, మధ్యంతర ఎన్నికలు ఖాయమని అందుకు సిద్ధపడాలని తెలుగుదేశం అధినేత చంద్రబాబు నాయుడు ముఖ్యనాయకులకు హింట్ ఇచ్చినట్టు తెలుస్తోంది. పార్టీ చీలిపోకుండా కాంగ్రెస్ హై కమాండ్ అన్నిముందు జాగ్రత్త చర్యలు తీసుకుంటున్నట్టు తెలిసింది.