రాజకీయాల్లోకి పోతుల సురేష్

దివంగత తెలుగుదేశం శాసనసభ్యుడు పరిటాల రవి అనుచరుడు పోతుల సురేష్ రాజకీయాల్లోకి ప్రవేశించనున్నట్లు ప్రచారం జరుగుతోంది. పరిటాల రవి హత్య తర్వాత అజ్ఞాతంలోకి వెళ్లిన సురేష్ ను అనంతపురం జిల్లా పోలీసులు ఇటీవల గుజరాత్ లోని సూరత్ లో అరెస్టు చేశారు. అయితే, సురేష్ లొంగిపోయాడనే వదంతులు కూడా వెలుగులోకి వచ్చాయి. పరిటాల రవి మరో ముఖ్య అనుచరుడు చమన్ కూడా పోలీసులకు చిక్కే అవకాశం ఉన్నట్లు చెబుతున్నారు. వీరిద్దరు రాజకీయాల్లోకి వస్తారని చెబుతున్నారు. పోతుల సురేష్ తెలుగుదేశం పార్టీ తరఫున ధర్మవరం నుంచి పోటీ చేయాలనుకుంటున్నట్లు కూడా చెబుతున్నారు. ఇప్పటి నుంచే అందుకు రంగం సిద్ధం చేసుకోవాలని అనుకుంటున్నట్లు వినికిడి.

పోతుల సురేష్ తో రాజీ కుదుర్చుకోవడానికి అనంతపురం జిల్లాకు చెందిన కాంగ్రెసు సీనియర్ శాసనసభ్యుడు జెసి దివాకర్ రెడ్డి ప్రయత్నించారని ఊహాగానాలు చెలరేగాయి. అయితే, అందుకు సురేష్ అంగీకరించలేదని అంటున్నారు. ఈ స్థితిలోనే పోతుల సురేష్ అరెస్టు జరిగిందనే మాట కూడా వినిపిస్తోంది. తెలుగుదేశం తనకు ధర్మవరం టికెట్ ఇవ్వకపోతే కాంగ్రెసు నుంచైనా పోటీ చేయడానికి పోతుల సురేష్ సిద్ధపడుతున్నట్లు చెబుతున్నారు.

పరిటాల రవి హత్య తర్వాత ఆయన భార్య పరిటాల సునీత తమను పట్టించుకోలేదని పోతుల సురేష్, ఆయన భార్య పోతుల సునీత బాధ పడుతున్నట్లు కూడా ప్రచారం జరుగుతోంది. తెలుగుదేశం తరఫున రాజకీయాలకు అవకాశం ఇస్తారా, లేదా అనే విషయంపై తేల్చుకోవడానికి పోతుల సునీత చంద్రబాబును కలిసినట్లు భావిస్తున్నారు. చంద్రబాబు ప్రతిస్పందనను బట్టి ఏం చేయాలనే విషయంపై పోతుల సురేష్ దంపతులు నిర్ణయించుకుంటారని తెలుస్తోంది.