టాలీవుడ్ కు 'డ్రగ్' గుబులు

టాలీవుడ్ ను డ్రగ్ గుబులు పట్టుకుంది. హీరో రవితేజ సోదరులు రఘుబాబు, భరత్ రాజ్ మాదక ద్రవ్యాలతో పట్టుబట్టడంతో తెలుగు సినిమా రంగం డొంక కదిలే పరిస్థితి ఏర్పడింది. హైదరాబాద్ పోలీసు కమిషనర్ ఎకె ఖాన్ మాటలు మరింత కలవర పెడుతున్నాయి. మాదక ద్రవ్యాలకు సంబంధించి తమ వద్ద 60 మంది ప్రముఖుల పేర్లున్నాయని, ఆధారాలు సేకరించిన తర్వాత అరెస్టు చేస్తామని ఆయన శుక్రవారం మీడియా ప్రతినిధుల సమావేశంలో అన్నారు. ఇందులో హీరోయిన్లు కూడా ఉన్నారని ఆయన అన్నారు. తెలుగు సినీ ప్రపంచానికి మాదక ద్రవ్యాలకు అవినాభావ సంబంధం ఉందనే విషయం కొత్తది కాదు. గతంలో దాదార్ ఎక్స్ ప్రెస్ సినిమా నిర్మాత వెంకటేశ్వర రావు, యువత సినిమా నిర్మాత హేమంత్ రామకృష్ణ డ్రగ్ కేసుల్లో అరెస్టయ్యారు. వెంకటేశ్వర రావు 20 కోట్ల రూపాయల విలువ చేసే హెరాయిన్ తో పట్టుబడ్డాడు. హేమంత్ రామకృష్ణ కూడా హెరాయిన్ తో పట్టుబడ్డాడు.

సినీ ప్రపంచంలో చాలా మందికి రఘుబాబు, భరత్ రాజ్ మాదక ద్రవ్యాలను సరఫరా చేస్తుంటారనే అనుమానాలున్నాయి. పోలీసుల వద్ద ఉన్న 60 పేర్లు ఎవరవనేది సినీ ప్రముఖులు భుజాలు తడుముకుంటున్నారు. వీరిలో పారిశ్రామికవేత్తలు, రాజకీయ నాయకుల కుమారులు, కూతుళ్లు ఉన్నట్లు భావిస్తున్నారు. పబ్ లు కూడా మాదక ద్రవ్యాలకు కేంద్రాలుగా మారుతున్నాయని అంటున్నారు. మాదక ద్రవ్యాలకు హైదరాబాదులోని 9 పబ్ లు నిలయంగా మారినట్లు అనుమానిస్తున్నట్లు ఖాన్ చెప్పారు. వాటిపై నిఘా పెట్టామని అంటున్నారు.

హైదరాబాదులోని బంజారాహిల్స్, జూబిలీ హిల్స్ వంటి సంపన్న వర్గాలు గల ప్రాంతాల్లో మాదక ద్రవ్యాల వాడకం ఎక్కువగా ఉన్నట్లు తెలుస్తోంది. యువతులు కూడా వీటి బారిన పడుతున్నట్లు తెలుస్తోంది. మాదక ద్రవ్యాల వాడకం వళ్ల యువతులు స్పృహ తప్పుతున్నారని, అత్యాచారాలు జరిగే ప్రమాదం ఉందని ఖాన్ హెచ్చరించారు. మొత్తమ్మీద రఘుబాబు, భరత్ రాజ్ పట్టుబడడంతో ఆ గొడవ ఎవరిని, ఎంత మందిని చుట్టుకుట్టుందో అనే భయాందోళనలు వ్యక్తమవుతున్నాయి.