జగన్ వైపు వంగవీటి రాధ?

ప్రజారాజ్యం పార్టీ అధ్యక్షుడు చిరంజీవిపై తీవ్ర ఆసంతృప్తితో ఉన్న వంగవీటి రాధాకృష్ణ వైయస్ జగన్ శిబిరంలో చేరే అవకాశాలున్నట్లు ప్రచారం జరుగుతోంది. వైయస్ జగన్ కొత్త పార్టీ పెడుతుండడంతో విజయవాడ రాజకీయాల్లో కొత్త సమీకరణలు చోటు చేసుకుంటున్నాయి. తన కార్యక్రమానికి రాకుండా అవమానించడంతో చిరంజీవిపై రాధాకృష్ణ తీవ్ర ఆగ్రహంతో ఉన్నారు. ఆయన ప్రజారాజ్యం పార్టీకి రాజీనామా చేసి కాంగ్రెసు పార్టీలో గానీ తెలుగుదేశం పార్టీలో గానీ చేరాలని అనుకున్నారు. అయితే, శాసనసభ్యుడు మల్లాది విష్ణు అడ్డుపడడంతో ఆయన కాంగ్రెసులో చేరలేకపోయారు. అదే విధంగా తెలుగుదేశం పార్టీలో చేరడానికి వంగవీటి రాధాకు తన సామాజిక వర్గానికే చెందిన ఓ నాయకుడు అడ్డుపడ్డారు. దీంతో తాత్కాలికంగా ప్రజారాజ్యం పార్టీతోనే సర్గుకుపోవాలని నిర్ణయించుకున్నారు. అయితే, ఆయన క్రియాశీలకంగా పనిచేయడం లేదు.

వైయస్ జగన్ పార్టీ పెడుతుండడంతో ఆ పార్టీలో చేరే విషయంపై ఆయన ఆలోచన చేస్తున్నట్లు సమాచారం. వైయస్ జగన్ పార్టీ కోసం విజయవాడలో ఇప్పటికే ఏర్పాట్లు జరుగుతున్నాయి. మాజీ శాసనసభ్యుడు జలీల్ ఖాన్ వైయస్ జగన్ పార్టీలో చేరేందుకు ఇది వరకే నిర్ణయించుకున్నారు. జగన్ పార్టీ కోసం బందర్ రోడ్డులో ఓ భవనాన్ని తీసుకున్నారు. పార్టీలోకి వంగవీటి రాధాకృష్ణ వస్తే వైయస్ జగన్ కు అసెట్టే అవుతుంది.

తెలుగుదేశం పార్టీలో వల్లభనేని వంశీ, దేవినేని ఉమామహేశ్వర రావు వంటివారు ఆధిపత్యం చలాయిస్తుండగా, కాంగ్రెసులో దేవినేని నెహ్రూ ఆధిపత్యం చెలాయిస్తున్నారు. నిన్న మొన్నటి వరకు వైయస్ జగన్ సమర్థిస్తూ వచ్చిన కాంగ్రెసు శాసనసభ్యులు జోగి రమేష్, మల్లాది విష్ణు మెల్లగా పక్కకు తప్పుకున్నారు. దీంతో వంగవీటి రాధాకృష్ణ జగన్ పార్టీలో చేరడానికి ఏ విధమైన అడ్డంకులుండవని భావిస్తున్నారు.