వర్మ 'నా ఇష్టం'లో ఏం ఉంది?

రామ్ గోపాల్ వర్మ ఈ రోజు సాయింత్రం "నా ఇష్టం" అనే టైటిల్ తో ఓ పుస్తకం విడుదల చేస్తున్నారు. టీవీ ఛానెల్లో,మీడియాలో ఎక్కడ చూసినా ఈ వార్తే. ఇంతకీ ఆ పుస్తకంలో ఏం ఉండబోతోంది..అన్నదే చర్చనీయాంశం. ఇక వర్మ ఈ పుస్తకాన్ని..తన బయోగ్రఫిగా ఈ పుస్తకాన్ని ఆవిష్కరించనున్నారని చెప్తున్నారు. అయితే ఆయన రాసిన తన బ్లాగ్ లో రాసిన ఆర్టికల్స్ లో ఎంపిక చేసి తెలుగులో అందిస్తున్న సమాహారం ఈ పుస్తకం అని తెలుస్తోంది. అలాగే ఆర్ జీ వీ జూమ్ లో చాలా మంది బ్లాగర్లు అడిగిన ప్రశ్నలకు సమాధానాలు ఆయను చాలా కాలంగా ఇస్తున్నారు. వాటిలో కూడా కొన్నిటిని ఎంపిక చేసి ప్రచురించారు. వీటితో పాటు సాక్షి దినపత్రిక సండే ఎడిషన్ ఫన్ డే లో నా పేరుతో కొన్ని ఆర్టికల్స్, ప్రశ్న-జవాబులు కొద్ది వారాలుగా ఇస్తున్నారు. అవి కూడా ఈ పుస్తకంలో దర్శనమిచ్చే అవకాశం ఉంది.

ముఖ్యంగా ఈ పుస్తకంలో రామూఇజం(వర్మ సిద్దాంతాలు),రామూ ఆలోచనలు, రామూ సినిమాలు, రామూ విజయాలు, అపజయాల విశ్లేషణలకి స్ధానం ఉంటుంది. రామూఇజంలో భాగంగా ప్రముఖ జర్మనీ తత్వవేత్త నీషే ని ఆయన ఈ పుస్తకంలో ప్రస్దావించనున్నారు. దానితో పాటు అయాన్ రాండ్ రాసిన ఫౌంటిన్ హెడ్ ని తన జీవితానికి ఏ విధంగా అప్లయ్ చేసుకున్నారో, అందులోంచి తానేం తీసుకున్నారో, అది తన విజయానికి ఏ విధంగా దోహదం చేసిందో చెప్పనున్నారు. వీటిన్నటితో పాటు రామ్ గోపాల్ వర్మ జీవితానికి, సినిమాలకు సంభందించిన కొన్ని ఫోటోలు, అరుదైన వర్కింగ్ స్టిల్స్ కూడా ఈ పుస్తకంలో చోటు చేసుకోనున్నాయి. ఇక ఈ పుస్తకాన్ని పబ్లిష్ చేస్తున్న ఎమొస్కో వారే ఆవిష్కరించనున్నారు. ఇక ఈ పుస్తకాన్ని అంకితం చేసేది మరెవరికో కాదు..ఆయనకే. ఈ పుస్తకం మొదట్లో...అంకితం-నాకే అని ఉంటుంది.

ప్రతీ విషయంలోనూ వివాదం చేసి ఆసక్తి రేపే వర్మ ఈ సారి కూడా తనదైన మార్కెటింగ్ స్టాటజీని వినియోగిస్తున్నాడంటున్నారు. ఈ నాఇష్టం పుస్తకాన్ని ఆయన సినిమా రేంజిలో ప్రమోట్ చేయనున్నారు. ఈ పుస్తకావిష్కరణ ఈ రోజు(బుధవారం, డిసెంబర్ 1, 2010) సాయింత్రం ఆరున్నరకి తాజా బంజారా లాన్స్ లో జరగనుంది.