జగన్ ఓదార్పుపై నీలినీడలు?

కాంగ్రెసు కడప పార్లమెంటు సభ్యుడు వైయస్ జగన్ ఓదార్పు యాత్రపై నీలినీడలు అలుముకుంటున్నాయి. ప్రకాశం జిల్లా ఓదార్పు యాత్ర తర్వాత ఆయన నెల్లూరు జిల్లాలో ఓదార్పు యాత్ర చేపట్టాల్సి ఉంది. నెల్లూరు జిల్లాలో ఓదార్పు యాత్రకు ఏర్పాట్లు కూడా ముమ్మరంగానే సాగాయి. అయితే, ఒక్కసారి కాంగ్రెసు నాయకత్వం జగన్ ఓదార్పు యాత్రను కట్టడి చేసేందుకు ముందుకు దూకింది. నెల్లూరు జిల్లాలో జగన్ ఓదార్పు యాత్రకు ఏర్పాట్లు చేస్తున్నవారిపై చర్యలకు దిగింది. పార్లమెంటు సభ్యుడు మేకపాటి రాజగోపాల్ రెడ్డి, శాసనసభ్యుడు మేకపాటి చంద్రశేఖరెడ్డిలకు పార్టీ అధిష్టానం నోటీసులు జారీ చేసింది. మిగతా నాయకులకు కూడా పార్టీ షోకాజ్ నోటీసులు జారీ చేసింది. ఈ రకంగా మిగతా నాయకులకు ముందస్తు హెచ్చరికలు పంపింది. దీంతో చాలా మంది వైయస్ జగన్ ఓదార్పు యాత్ర విషయంలో వెనక్కి తగ్గే అవకాశాలున్నాయి.

వైయస్ జగన్ వర్గానికి చెందిన భూమన కరుణాకర్ రెడ్డి తదితరులు నెల్లూరు జిల్లాలో మకాం వేశారు. అయితే, ఓదార్పు యాత్రను వాయిదా వేసే ఉద్దేశంతో జగన్ ఉన్నట్లు చెబుతున్నారు. అక్టోబర్ మొదటివారంలో జగన్ నెల్లూరు జిల్లాలో ప్రవేశించాల్సి ఉంది. కానీ ఓదార్పు యాత్రను అక్టోబర్ 15వ తేదీకి వాయిదా పడినట్లు తెలుస్తోంది. అయితే, 15వ తేదీ తర్వాతనైనా జగన్ ఓదార్పు యాత్ర సాగుతుందా అనేది అనుమానమే. వైయస్సార్ విగ్రహాల ప్రతిష్టాపనలో ఇంతకు ముందు ఎదురు కాని వ్యతిరేకత నెల్లూరు జిల్లాలో ఎదరువుతోంది. వివాదాలు, ఘర్షణలు జరుగుతున్నాయి. అధిష్టానం జగన్ వర్గీయులపై వరుసగా చర్యలు తీసుకునేందుకే మొగ్గు చూపుతోంది. వైయస్ జగన్ ను నమ్మి ఎంత మంది పార్టీకి వ్యతిరేకంగా పనిచేస్తారనేది అనుమానమే.

ఓదార్పు యాత్ర వద్దని అధిష్టానం చెప్పలేదని జగన్ వర్గీయులు చేస్తున్న వాదనకు కూడా గండి పడింది. పార్టీ కార్యక్రమాలు తప్ప ఇతర కార్యక్రమాల్లో పాల్గొనకూడదని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ స్పష్టంగా చెప్పారు. ఓదార్పు యాత్రను విడిగా ప్రస్తావించకుండా ఆ విధంగా చెప్పారు. అందులో ఓదార్పు యాత్ర కూడా ఉంటుందనేది వేరుగా చెప్పాల్సిన అవసరం లేకుండా ఆయన చెప్పారు. పార్టీ తీసుకుంటున్న చర్యలు కూడా అందుకు అనుగుణంగానే ఉంది. అందువల్ల జగన్ ఓదార్పు యాత్రపై నీలినీడలు అలుముకున్నాయి.