వైయస్ జగన్ ది ఎన్టీఆర్ స్లోగన్

తెలుగుదేశం పార్టీ వ్యవస్థాపక అధ్యక్షుడు ఎన్టీ రామారావు నినాదాన్ని వైయస్ జగన్ స్వీకరించే అవకాశాలున్నాయి. తెలుగు ప్రజల ఆత్మగౌరవాన్ని ఆయన తెలుగుదేశం పార్టీ నుంచి తన సొంతం చేసుకోవడానికి ప్రయత్నాలు మొదలు పెట్టారు. తెలుగు ప్రజల ఆత్మగౌరవ నినాదంతో ఉప్పెన సృష్టించి కాంగ్రెసు పార్టీని మట్టి కరిపించిన స్వర్గీయ ఎన్టీ రామారావు ఆదర్శంగా ఆయన రంగంలోకి దిగే అవకాశాలున్నాయి. కాంగ్రెసు అధ్యక్షురాలు సోనియా గాంధీ నడుపుతున్న రాజకీయాలను టార్గెట్ చేస్తూ ఆయన తన సమరాన్ని సాగించే అవకాశాలున్నాయి. ముఖ్యమంత్రి రోశయ్య విషయంలో కాంగ్రెసు పార్టీ అధిష్టానం అనుసరించిన విధానాలను, ప్రస్తుత ముఖ్యమంత్రి కిరణ్ కుమార్ రెడ్డి మంత్రివర్గంలో చోటు చేసుకున్న అసమ్మతి వంటి కారణాలను ఎత్తి చూపుతూ ఆయన తెలుగు ప్రజల ఆత్మగౌరవ నినాదాన్ని ముందుకు తెచ్చే అవకాశాలున్నాయి.

తెలుగు ప్రజల ఆత్మగౌరవాన్ని కాంగ్రెసు అధిష్టానం దెబ్బ తీస్తుందని ఆయన తీవ్ర విమర్శలు గుప్పించవచ్చు. సోనియా రాష్టంలో కీలుబొమ్మలకే పెద్ద పీట వేస్తున్నారని, దాని వల్ల రాష్ట్రంలో కాంగ్రెసు మట్టి కొట్టుకుపోతుందని జగన్ వర్గీయులు ఇప్పటికే చెబుతున్నారు. కాంగ్రెసుకు ఆంధ్రప్రదేశ్ లో బీహార్ లో పట్టిన గతే పడుతుందని ఇప్పటికే వారు జోస్యం చెబుతున్నారు. తెలుగుదేశం పార్టీపై కన్నా వైయస్ జగన్ కాంగ్రెసుపైనే ఎక్కువగా దాడులు చేసేందుకు సిద్ధపడినట్లు చెబుతున్నారు.

కాగా, హైదరాబాదులో తన పార్టీపై కసరత్తు చేస్తున్నారు. వైయస్సార్ కాంగ్రెసుగా తన పార్టీకి నామకరణం చేస్తారని అంటున్నారు. తిరుపతికి చెందిన నాయకుడు చెవిరెడ్డి భాస్కరరెడ్డి అనాలోచితంగా ఈ పేరును వైయస్ జగన్ పార్టీగా చెప్పారు. పార్టీ పేరు ఖాయం కావడం వల్లనే అనుకోకుండా ఆ పేరు ఆయన నోటికి వచ్చిందని అంటున్నారు. వైయస్సార్ రాష్ట్రీయ కాంగ్రెసు పేరును కూడా వైయస్ జగన్ పరిశీలించినట్లు తెలుస్తోంది. ఏమైనా, కాంగ్రెసును మట్టి కరిపించేందుకు వైయస్ జగన్ కదనకుతూహలంతో ఉన్నారు.