వైయస్ భగీరథుడు రెడీ

దివంగత నేత వైయస్ రాజశేఖర రెడ్డి జీవిత చరిత్ర ఆధారంగా భగీరథుడు సినిమా విడుదలకు రెడీ అయింది. చిత్ర నిర్మాణం పూర్తయింది. వైయస్ ప్రథమ వర్ధంతి నాటికి అన్ని ఏర్పాట్ల మాదిరిగానే ఆయన కుమారుడు, పార్లమెంటు సభ్యుడు వైయస్ జగన్ చిత్ర నిర్మాణ విడుదల ఏర్పాట్లు కూడా చేసినట్లు ఉన్నారు. అందుకే భగీరథుడు సినిమా సెప్టెంబర్ 1వ తేదన విడులవుతోంది.

వైయస్ రాజశేఖర రెడ్డి పాత్రను వినోద్ కుమార్ అనే నటుడు పోషించాడు. వైయస్ సతీమణి విజయమ్మ పాత్రను యమున పోషించింది. యాదగిరి సంగీతం అందించగా, గిరిరెడ్డి దర్శకత్వం అందించారు. తనకు సినీ నిర్మాణంలో అనుభవం లేదని, అయితే మనసు ఉంటే ఏదైనా చేయవచ్చునని వైయస్ నేర్పిన పాఠంతోనే తాను ఈ పనికి పూనుకున్నానని గిరి రెడ్డి చెబుతున్నారు.

సినిమాను తాము కమర్షియల్ యాంగిల్ తో చేయలేదని, ప్రజా బంధువుగా వైయస్సార్ వ్యక్తిత్వాన్ని చూపించడానికి ప్రయత్నించానని గిరిరెడ్డి అన్నారు. వైయస్సార్ ను ముఖ్యమంత్రిగా ఉన్నప్పుడు చూడలేదని, అంతకు ముందు ఓసారి చూశానని వినోద్ కుమార్ అన్నారు. వైయస్సార్ జీవిత చరిత్ర ఆధారంగా నిర్మించిన భగీరథుడు కమర్షియల్ గా విజయవంతం అవుతుందా లేదా అనేది వేచి చూడాల్సిందే.