చిరంజీవి వర్గం ఎమ్మెల్యేల్లో అసంతృప్తి?

By Pratap

Published: Friday, December 30, 2011, 10:05 [IST]

కాంగ్రెసు పార్టీలో ప్రజారాజ్యం పార్టీని విలీనం చేసిన మెగాస్టార్ చిరంజీవికి అసంతృప్తి సెగ తగులుతున్నట్లు వార్తలు వస్తున్నాయి. చిరంజీవితో పాటు ప్రజారాజ్యం పార్టీ శాసనసభ్యులు 17 మంది ఉన్నారు. వీరిలో ఇద్దరికి మాత్రమే కాంగ్రెసు అధిష్టానం మంత్రి పదవులు ఇవ్వడానికి సుముఖత వ్యక్తం చేస్తోంది. మరోవైపు, ముఖ్యమంత్రి కిరణ్ కుమార్ రెడ్డి చిరంజీవి శాసనసభ్యులతో మాత్రమే మంత్రి వర్గ విస్తరణ చేయడానికి సిద్ధంగా లేనట్లు వార్తలు వస్తున్నాయి. తన వర్గానికి చెందిన ముగ్గురు శాసనసభ్యులకు చిరంజీవి మంత్రి పదవులు కోరుతుండగా రెండింటికి మాత్రమే పరిమితం కావాలని అధిష్టానం అంటోంది. దీంతో చిరంజీవి సంతృప్తి చెందినా శాసనసభ్యుల్లో మాత్రం అసంతృప్తి తలెత్తుతోందని అంటున్నారు. రాయలసీమ నుంచి ఎమ్మెల్సీ సి. రామచంద్రయ్యకు, కోస్తా నుంచి గంటా శ్రీనివాసరావుకు మంత్రి పదవులు దక్కే అవకాశాలున్నాయి.

గంటా శ్రీనివాస రావు విషయంలో పెద్దగా వ్యతిరేకత ఎదురు కానప్పటికీ రామచంద్రయ్య విషయంలో మాత్రం తీవ్ర వ్యతిరేకత ఎదురవుతున్నట్లు వార్తలు వస్తున్నాయి. ఎమ్మెల్సీ పదవి ఇచ్చే వరకు సరే గానీ, ఆయనకు మంత్రి పదవి ఇవ్వడం మాత్రం సరి కాదనే వాదన వినిపిస్తోంది. కడప జిల్లాకు చెందిన రామచంద్రయ్యకు కాంగ్రెసు నుంచి కూడా వ్యతిరేకత ఎదురవుతోంది. మంత్రి డిఎల్ రవీంద్రా రెడ్డితో పాటు శాసనసభ్యుడు వీరశివా రెడ్డి తదితరులు సి. రామచంద్రయ్యకు మంత్రి పదవి ఇవ్వాలనే ప్రతిపాదనను వ్యతిరేకిస్తున్నట్లు తెలుస్తోంది.

ప్రజారాజ్యం పార్టీలో వంగా గీత వంటి సీనియర్లను పక్కన పెట్టి రామచంద్రయ్య పేరును మంత్రి పదవికి సూచించడం సమంజసం కాదని అంటున్నారు. అలాగే, తెలంగాణ నుంచి ఎవరికీ మంత్రి పదవి దక్కే అవకాశాలు లేవు. నిజామాబాద్ జిల్లాకు చెందిన అనిల్ మంత్రి పదవి కోసం తీవ్రంగా ప్రయత్నాలు సాగిస్తున్నారు. తెలంగాణకు చెందిన ఇద్దరు ప్రజారాజ్యం పార్టీ శాసనసభ్యుల్లో అనిల్‌కు మంత్రి పదవి ఇవ్వాలని చిరంజీవి సూచిస్తున్నారు. కానీ అధిష్టానం సుముఖంగా లేదు. ఈ స్థితిలో కొంత మంది ప్రజారాజ్యం పార్టీ శాసనసభ్యులు ఇప్పటికే ముఖ్యమంత్రి కిరణ్ కుమార్ రెడ్డి వద్ద అసంతృప్తిని వ్యక్తం చేసినట్లు కూడా వార్తలు వచ్చాయి. ఏమైనా, ప్రజారాజ్యం పార్టీలో అసంతృప్తి వల్ల కాంగ్రెసుకు నష్టమే గానీ చిరంజీవికి పోయేదేమీ లేదని అంటున్నారు.

Published On December 30, 2011