ఎలిజబెత్-2 కోసం భారీ బంగారు నాణెం

By Srinivas

Published: Monday, May 28, 2012, 17:21 [IST]

బ్రిటిష్ రాణి రెండవ ఎలిజబెత్ పర్యటనను పురస్కరించుకొని ఆస్ట్రేలియా ప్రపంచంలోనే అతిపెద్ద బంగారు నాణాన్ని ఆవిష్కరించింది. దీని బరువు అక్షరాలా వెయ్యి కిలోలు ఉంటుంది. కామన్వెల్తు దేశాధినేతల సమావేశంలో పాల్గొనేందుకు క్వీన్ ఎలిజబెత్-2 పెర్త్ వస్తున్న సందర్భంగా ఈ నాణెం తయారు చేశారు. ఈ నాణెం ఎనభై సెంటీమీటర్ల వ్యాసార్థం, 12 సెంటీమీటర్ల మందం కలిగి ఉంది. నాణేనికి ఓ వైపు కంగారు, మరోవైపు ఎలిజబెత్ రాణి చిత్రాన్ని ముద్రించారు. ఇందులో ఉపయోగించిన బంగారం విలువ 5.5 కోట్ల అమెరికన్ డాలర్లు. అంటే మన రూపాయల్లో చెప్పాలంటే సుమారు రూ.275 కోట్లు ఉంటుంది. దీనిని స్వచ్చమైన పుత్తడితో తయారు చేశారు. ఇది 99.99 స్వచ్చత గల నాణెం.

ప్రపంచంలో ఇంతకుముందు అత్యంత బరువైన నాణెంగా రికార్డులకెక్కిన దానికన్నా దీని బరువు చాలా ఎక్కువ. గతంలో రాయల్ కెనడియన్ మింట్ భారీ బంగారు నాణేన్ని తయారు చేసింది. దీనికన్నా పెర్త్ మింట్ తయారు చేసిన ఈ బంగారు నాణెం బరువు ఐదు రెట్లు ఎక్కువ. సుదీర్ఘ కాలం చరిత్ర పుటల్లో నిలిచి ఉండే నాణెం తయారు చేయాలని భావించిన పెర్త్ మింట్ ఈ నాణేన్ని తయారు చేసిందట.

Published On May 28, 2012