బెజవాడ సినిమా చిచ్చు: వంగవీటి వర్సెస్ దేవినేని

By Srinivas

Published: Tuesday, November 29, 2011, 9:38 [IST]

బెజవాడ చిత్రం విజయవాడ నగర ప్రజల్లో హైటెన్షన్‌కు గురి చేస్తోంది. నాగచైతన్య హీరోగా వస్తున్న ఈ చిత్రం వంగవీటి వర్గీయులను, దేవినేని వర్గీయులను ఆందోళనకు గురి చేస్తోంది. చిత్రంలో తమ నేతలను కించపరిస్తే ఊరుకునేది లేదని ఇరువర్గాల అభిమానులు హెచ్చరికలు జారీ చేశారు. ఆ చిత్రంలో వంగవీటి రంగా కుటుంబాన్ని కించపర్చేలా ఉందనే వాదనలు ఇటీవల వినిపించాయి. దీంతో ఆయన అభిమానులు రాంగోపాల్ వర్మను హెచ్చరించారు. తమ నేతకు వ్యతిరేకంగా ఉంటే చిత్రాన్ని అంతటా అడ్డుకుంటామని హెచ్చరించారు. ఈ చిత్రం డిసెంబర్‌లో విడుదల కానుంది.

అయితే విడుదలకు రెండు మూడు రోజుల ముందు నగరంలో వెలిసిన పోస్టరు మరోసారి కలకలం రేపింది. దేవినేని తనయుడు దేవినేని అవినాష్ పేరుతో నగర కూడలిలో ఓ పోస్టరు వెలిసింది. దేవినేని సోదరులు సృష్టించిన చరిత్ర కళ్లారా చూడటానికి బెజవాడ అంటూ ఆ పోస్టరులో ఉంది. దీంతో వంగవీటి వర్గాల్లో ఆందోళన రెట్టింపయింది. వంగవీటి కుటుంబాన్ని చిత్రంలో తక్కువ చేసి చూపిస్తే మాత్రం ఊరుకునేది లేదని అడ్డుకుంటామని ఆయన వర్గం హెచ్చరిస్తోంది.

ఈ పోస్టరును ఎవరు వేసింది తెలియరాలేదు. పోస్టరు వల్ల నగరంలో ఉద్రిక్త పరిస్థితులు తలెత్తకుండా ఉండటానికి పోలీసులు దానిని తొలగించారు. నగర ప్రజల్లో బెజవాడ టైటిల్ నుండి మొదలైన హైటెన్షన్ వంగవీటి, దేవినేని వర్గాల హెచ్చరికల వరకు కొనసాగుతూనే ఉంది. చిత్రంలో ఏమైనా తేడా వస్తే ఊరుకునేది లేదని ఇరువర్గాలు హెచ్చరిస్తున్నాయి. దీంతో బెజవాడ చిత్రం విడుదల అంటేనే ప్రజలు భయపడే పరిస్థితి కనిపిస్తోందట.

Published On November 29, 2011