డర్టీ పిక్చర్: ఎవరిపై బురద?

దక్షిణాది అందాల తార సిల్క్ స్మిత జీవితం ఆధారంగా నిర్మించిన డర్టీ పిక్చర్ సినిమా వెనక కథ చాలానే ఉందని అంటున్నారు. సిల్క్ స్మితగా ఈ సినిమాలో విద్యాబాలన్ నటిస్తోంది. సిల్క్ స్మిత పోలికలు ఏ మాత్రం ఆమెకు లేవు. సిల్క్ స్మిత కళ్లలో చూపించే మత్తును విద్యాబాలన్ ఓ కోశానా చూపించలేదని ట్రయలర్స్, పోస్టర్లు చూస్తుంటే అర్థమవుతోంది. అంగాంగ ప్రదర్శన మాత్రం బాగానే చేసినట్లుంది. ఈ సినిమాను నిర్మించడంలో ఏక్తా కపూర్‌కు దురుద్దేశం ఉందనే వాదన వినిపిస్తోంది.

దక్షిణాది సినిమాల్లో తన అందాలను ఆరబోసి యువతను మత్తులో ముంచిన సిల్క్ స్మిత అకాలంగా మృత్యువాత పడింది. ఆమె మరణం అప్పట్లో ఒక షాక్. అయితే ఆ మరణం వెనక రహస్యం ఏమిటనేది తేలలేదు. సిల్క్ స్మిత జీవితానికి డర్టీ పిక్చర్‌లో ఏ మాత్రం న్యాయం చేయలేదనే అభిప్రాయం బలంగా వినిపిస్తోంది. ఈ సినిమా కోసం సిల్క్ స్మిత వ్యక్తిగత జీవితంపై ఏ విధమైన పరిశోధనలు చేశారో, ఏ మేరకు వాస్తవాలను సినిమాలో చూపిస్తారో అర్థం కావడం లేదు. కానీ సినిమా మాత్రం విపరీతమైన ఆసక్తి కలిగిస్తోంది.

దక్షిణాది హీరోలను అప్రతిష్టపాలు చేసే ప్రణాళిక డర్టీ పిక్చర్ చిత్ర నిర్మాణంలో ఉందనే విమర్శలు వినిపిస్తున్నాయి. దక్షిణాదికి చెందిన ఓ సూపర్ స్టార్‌ సిల్క్ స్మితతో వ్యక్తిగత సంబంధాలు పెట్టుకున్నట్లు సినిమాలో చూపించినట్లు ఊహాగానాలు చెలరేగుతున్నాయి. ఆ హీరోగా డర్టీ పిక్చర్‌లో నసీరుద్దీన్ షా నటించాడట. ఇద్దరు హీరోలను టార్గెట్ చేసుకుని ఈ సినిమా రూపొందించినట్లు చెబుతున్నారు. ఈ సినిమాపై ఇప్పటికే తమిళ సూపర్ స్టార్ రజనీకాంత్ అభిమానులు అగ్గి మీద గుగ్దిలమవుతున్నారు.

విడుదలకు ముందే వివాదాలకు తెర తీసిన డర్టీ పిక్చర్ విడుదలైన తర్వాత ఎన్ని వివాదాలకు కారణమవుతుందో చెప్పలేం. సిల్క్ స్మిత జీవితాన్ని చిత్రించే విషయాన్ని పక్కన పెట్టి దక్షిణాది హీరోలను అప్రతిష్ట పాలు చేసే కోణం ఈ సినిమాలో ప్రధానంగా మారిందని అంటున్నారు.

English summary

There is a talk that Ekta Kapoor's Dirty Picture failed depict Silk Smitha's real story.