ఇలా ఐతే ఇబ్బందే!: కిరణ్ స్పీడ్‌కు బ్రేక్

By Srinivas

Published: Sunday, January 8, 2012, 10:33 [IST]

పథకాలు, తదితర విషయాల్లో ఇన్నాళ్లూ దూకుడుగా వెళ్లిన ముఖ్యమంత్రి కిరణ్ కుమార్ రెడ్డి జోరుకు ఇక కళ్లెం పడింది. కిరణ్‌పై ఇటీవల రాష్ట్రానికి వచ్చిన కేంద్రమంత్రి గులాం నబీ ఆజాద్‌కు చాలా ఫిర్యాదులు అందిన విషయం తెలిసిందే. గత కొంతకాలంగా మంత్రులు సైతం సిఎంపై అసంతృప్తి వ్యక్తం చేసినట్లుగా వార్తలు వచ్చాయి. ఈ నేపథ్యంలో అధిష్టానం వేసిన సమన్వయ కమిటీ సిఎం స్పీడ్‌కు స్పీడ్ బ్రేకర్లు వేస్తుందనే చెప్పవచ్చు. ఇకపై రాష్ట్రంలో కొత్తగా ఏ పథకాన్ని ప్రారంభించాలన్నా దాని గురించి ముందుగా పార్టీ రాష్ట్ర కోర్ కమిటీలో చర్చించాల్సిందేనంటూ సిఎంకు అధిష్ఠానం సూచనలు చేసింది. ఆజాద్ సమక్షంలో జరిగిన సమన్వయ కమిటీ సమావేశం ఈ మేరకు నిర్ణయం తీసుకుందని పార్టీ నేతలు అంటున్నారు. సిఎం సొంత నిర్ణయాలకు ఇక కళ్లెం పడినట్లేనని వారు భావిస్తున్నారు.

ప్రభుత్వ పథకాలపై సిఎం ఎవరితోనూ చర్చించడం లేదన్న నేతల ఫిర్యాదును ఆజాద్ తీవ్రంగానే పరిగణించారట. పార్టీకి, ప్రభుత్వానికి మధ్య సమన్వయలేమిని నివారించకపోతే పార్టీకి భవిష్యత్ ఉండదన్న నిర్ణయానికి ఆయన వచ్చారట. అందరి వాదనలు పరిగణనలోకి తీసుకున్న తర్వాత రాష్ట్ర కాంగ్రెస్ నేతల మధ్య సమష్టితత్వాన్ని పెంచాల్సిన అవసరముందన్న నిర్ణయానికి ఆయనవచ్చినట్లుగా తెలుస్తోంది. పార్టీ ముఖ్య నేతల మధ్య అగాధానికి కారణమవుతున్న సిఎం ఏకపక్ష నిర్ణయాలకు ఇక తెరదించాలని ఆజాద్ నిర్ణయించినట్లుగా సమాచారం. ఇకపై కొత్తగా ఏదైనా పథకాన్ని అమలు చేయాలన్నా.. ప్రస్తుత పథకాలను మార్చాలన్నా తప్పకుండా కోర్ కమిటీ సమావేశంలో చర్చించాలని ఆయన ఆదేశించారని పార్టీ వర్గాలు చెబుతున్నాయి.

వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి వర్గం ఎమ్మెల్యేలపై సిఎం కఠినవైఖరి ప్రదర్శించక పోవడంపై కూడా చాలామంది నేతలు ఆగ్రహంతో ఉన్నారు. అన్ని విషయాల్లో సమన్వయ కమిటీ నేతల భాగస్వామ్యం ఉంచే ఉద్దేశ్యంలో భాగంగా నెలకోసారి భేటీ ఉంటుందని కూడా ఆజాద్ స్పష్టం చేశారు. ఇన్నాళ్లూ సిఎంకు పూర్తి అధికారం ఇచ్చిన అధిష్టానం ఇక నుండి 2014 ఎన్నికలే లక్ష్యంగా అందరికీ సమ ప్రాధాన్యత ఇస్తూ సిఎంను కట్టడి చేయాలని నిర్ణయించుకున్నట్లుగా కనిపిస్తోంది.

Published On January 8, 2012