బాలయ్య, చిరు ఫైట్: ఎవరిది పై చేయి?

By Srinivas

Published: Monday, January 23, 2012, 10:50 [IST]

ఇటీవలి కాలంలో హీరో నందమూరి బాలకృష్ణ, తిరుపతి శాసనసభ్యుడు చిరంజీవి మధ్య మాటల యుద్ధం నడుస్తోంది. పార్టీ ఆదేశిస్తే తాను చిరంజీవిపై పోటీ చేసేందుకు కూడా సిద్ధమని విశాఖపట్నం పర్యటనలో బాలయ్య పరోక్షంగా సవాల్ విసరడం, ఆ సవాల్‌ను మెగాస్టార్ స్వీకరించడం ఘాటైన చర్చకు దారి తీసింది. నందమూరి హీరో వ్యాఖ్యలపై స్పందించిన చిరు మనది ప్రజాస్వామ్య దేశమని, ఎవరు ఎక్కడైనా పోటీ చేయవచ్చునని చెప్పి తాను కూడా సై అన్న భావన కలిగించారు. బాలయ్య వ్యాఖ్యలపై చిరంజీవి అభిమానులు, కాంగ్రెసు, పిఆర్పీ నేతలు తేలిగ్గా కొట్టి పారేస్తున్నారు. అలాంటి పరిస్థితే వస్తే బాలయ్య ఓడిపోవడం ఖాయమని అంటున్నారు. ఓ టీవి ఛానల్ చర్యా కార్యక్రమంలో పిఆర్పీ ఎమ్మెల్యే వెల్లంపల్లి శ్రీనివాస్, తమ నేతపై పోటీ చేస్తే బాలయ్యకు డిపాజిట్ కూడా దక్కదని వ్యాఖ్యానించారు. అంతేకాదు బాలయ్యకు పోటీదారు చిరంజీవి కాదని జూనియర్ ఎన్టీఆర్ అని చెప్పారు. ఇప్పటికే బాలయ్య రాజకీయ పర్యటనలతో ఉత్సాహంగా ఉన్న టిడిపి క్యాడర్, ఆయన అభిమానులు నేరుగా చిరంజీవికే సవాల్ విసరడంతో మరింత జోష్‌గా ఉన్నట్లుగా కనిపిస్తున్నారు.

చిరంజీవిపై పోటీకి బాలయ్యే సరైన అభ్యర్థి అని కొందరు భావిస్తున్నారు. బాలయ్యకు తన ఇమేజ్‌ను వోట్లుగా మలుచుకునే సత్తా ఉందని, ఐనా గత 2009 సాధారణ ఎన్నికల్లో తిరుపతి, పాలకొల్లు నియోజకవర్గాల్లో పోటీ చేసిన చిరంజీవి తిరుపతిలో ఆశించిన మెజార్టీతో గెలవలేదని, అంతేకాకుండా పాలకొల్లులో ఏకంగా బంగారు ఉషారాణి చేతిలో ఓడిపోయారని టిడిపి నాయకులు గుర్తు చేస్తున్నారు. సినిమాల్లో చిరంజీవి, బాలయ్యకు పోటా పోటీగా ఉన్నప్పటికీ రాజకీయాల్లోకి వచ్చేసరికి సమీకరణాలు మారుతాయని అభిప్రాయపడే వారు ఉన్నారు. బరిలోకి దిగితే తమ నేత గెలవడం ఖాయమని చిరు, బాలయ్య వర్గం వారు ఎవరికి వారే ధీమా వ్యక్తం చేస్తున్నారు. మొత్తానికి బాలయ్య, చిరంజీవి మధ్య జరుగుతున్న రాజకీయ మాటల యుద్ధం రాష్ట్రంలో పొలిటికల్ హీట్ పుట్టించిందని చెప్పవచ్చు.

Published On January 23, 2012