తిరుపతి టిడిపి ఎమ్మెల్యే అభ్యర్థి మోహన్‌బాబు?

By Srinivas

Published: Tuesday, March 20, 2012, 9:25 [IST]

ప్రముఖ సినీ నటుడు, మాజీ రాజ్యసభ సభ్యులు మోహన్ బాబు త్వరలో ఖాళీ కానున్న తిరుపతి నుండి పోటీ చేయవచ్చుననే ప్రచారం జరుగుతోంది. ప్రస్తుతం తిరుపతి శాసనసభ్యుడు చిరంజీవికి కాంగ్రెసు పార్టీ అధిష్టానం రాజ్యసభను ఇచ్చిన విషయం తెలిసిందే. దీంతో ఆయన త్వరలో ఎమ్మెల్యే పదవికి రాజీనామా చేయనున్నారు. ఆ స్థానానికి జరిగే ఉప ఎన్నికల్లో తెలుగుదేశం పార్టీ తరఫున మోహన్ బాబు రంగంలోకి దిగవచ్చునని కొందరు అభిప్రాయపడుతున్నారు. చాలాకాలం తర్వాత అంటే దాదాపు పదిహేను ఏళ్ల తర్వాత తెలుగుదేశం పార్టీ అధినేత నారా చంద్రబాబు నాయుడు మోహన్ బాబు విద్యాసంస్థలను సందర్శించారు. మోహన్ బాబు గతంలో టిడిపి నుండే రాజ్యసభకు వెళ్లారు. అయితే ఆ తర్వాత జరిగిన పరిణామాల కారణంగా వారిద్దరూ దూరమయ్యారు. సోమవారం తన జన్మదినోత్సవానికి మోహన్ బాబు టిడిపి అధినేతను ఆహ్వానించారు. తమ మధ్య ఎలాంటి శత్రుత్వం లేదని, విభేదాలు మాత్రమే పొడసూపినవని చెప్పారు. తాను టిడిపిలో చేరేందుకు బాబును ఆహ్వానించలేదని వివరణ ఇచ్చారు.

అయితే ఆ తర్వాత వేడుకలకు హాజరైన చంద్రబాబు.. తాను మోహన్ బాబును రాజకీయాల్లోకి ఆహ్వానిస్తున్నానని అన్నారు. దీంతో, మోహన్ బాబు టిడిపిలో చేరేందుకు బాబును ఆహ్వానించలేదని చెప్పినప్పటికీ.. చిరంజీవి రాజీనామా చేసి ఉప ఎన్నికల నోటిఫికేషన్ వచ్చిన తర్వాత టిడిపి అభ్యర్థిగా బరిలోకి దిగే అవకాశముందని అంటున్నారు. మోహన్ బాబు ఎప్పుడూ తన పుట్టిన రోజు వేడుకలను తన విద్యాసంస్థలలోనే జరుపుకుంటున్నప్పటికీ... చిత్తూరులోనే ప్రత్యేకంగా మోహన్ బాబు, చంద్రబాబులు చాలా రోజుల తర్వాత కలుసుకోవడం మోహన్ బాబును అభ్యర్థిగా దింపే సంకేతాలే కావొచ్చుననే అభిప్రాయాలు వ్యక్తమవుతున్నాయి.

Published On March 20, 2012