టివి9 సర్వే కెసిఆర్, జగన్‌కు అనుకూలమా?

ఈ నెల 18వ తేదిన జరగనున్న ఉప ఎన్నికల్లో ఏ పార్టీ గెలుస్తుంది?, ఏ అభ్యర్థి ఎంత మెజార్టీతో గెలుస్తుంది అనే అంశం చర్చనీయాంశమైంది. తెలంగాణ ప్రాంతంలోని ఆరు నియోజకవర్గాలతో పాటు, శ్రీ పొట్టి శ్రీరాములు నెల్లూరు జిల్లాలోని కొవూరు ఉప ఎన్నికలలో ఏ అభ్యర్థి గెలుస్తారు, ఎంత ఆధిక్యంతో గెలుస్తారనే విషయమై టివి9, టుడేస్ చాణక్యల ఆధ్వర్యంలో ప్రీపోల్ సర్వే నిర్వహించారు. వారు చేసిన సర్వే ప్రకారం తెలంగాణలోని ఐదు నియోజకవర్గాల్లో తెలంగాణ రాష్ట్ర సమితి, మహబూబ్ నగర్ జిల్లాలోని నాగర్ కర్నూల్ నియోజకవర్గంలో తెరాస, బిజెపి మద్దతిస్తున్న స్వతంత్ర అభ్యర్థి నాగం జనార్ధన్ రెడ్డి, కొవూరులో జగన్ పార్టీ అభ్యర్థి నల్లపురెడ్డి ప్రసన్న కుమార్ రెడ్డి గెలుపొందుతారని తెలిపింది.

ఏఏ అభ్యర్థి ఎంత శాతంతో గెలుస్తారని కూడా ఈ సర్వే తెలిపింది. కొవూరులో జగన్ పార్టీ అభ్యర్థి నల్లపురెడ్డి ప్రసన్న కుమార్ రెడ్డి 15 శాతం ఆధిక్యంతో గెలుస్తారని తెలిపింది. నాగం జనార్ధన్ రెడ్డి 18 శాతం ఆధిక్యంతో గెలుస్తారని తెలిపింది. టిఆర్ఎస్ అభ్యర్థులు ఇబ్రహీం (మహబూబ్‌నగర్) 9 శాతం, జూపల్లి కృష్ణా రావు (కొల్లాపూర్) 15 శాతం, జోగు రామన్న (అదిలాబాద్) 15 శాతం, గంపగోవర్ధన్(కామారెడ్డి) 6 శాతం, రాజయ్య(స్టేషన్ ఘనపూర్) 15 శాతంతో గెలుస్తారని సర్వే తెలిపింది. కాగా సర్వేలపై వైయస్సార్ కాంగ్రెసు పార్టీ మండిపడింది. టిఆర్ఎస్ కూడా ఈ సర్వేపై అసంతృప్తితో ఉన్నట్లుగా తెలుస్తోంది. భారీ మెజార్టీ వస్తుందని తాము చెబుతుంటే టివి9 సర్వే అందుకు విరుద్ధంగా ఉండటాన్ని వారు తప్పు పడుతున్నారట.

English summary

TV9 - Today's Chanakya pre poll survey showing that TRS and Jagan Party candidates will win in bypolls.