ఫ్యాన్స్ వెనక బాలయ్య: బాబుకు మరో తలనొప్పి?
బాలకృష్ణ పార్టీలో ప్రధానమైన పాత్ర ఆశిస్తున్న క్రమంలో భాగంగానే ఆ పరిణామాలు చోటు చేసుకున్నట్లు భావిస్తున్నారు. పార్టీ వర్కింగ్ ప్రెసిడెంట్గా తనకు అవకాశం కల్పిస్తే చంద్రబాబు ఏకపక్షంగా వ్యవహరించడానికి వీలు కాదని బాలకృష్ణ భావిస్తున్నట్లు తెలుస్తోంది. బాలకృష్ణను కూడా హరికృష్ణను పంపినట్లు పార్లమెంటుకు పంపి పార్టీ పగ్గాలను తన కుమారుడు నారా లోకేష్కు అప్పగించాలనే చంద్రబాబు ప్రయత్నాలు గమనించిన తర్వాతనే బాలకృష్ణ అభిమానులు తెర మీదికి వచ్చినట్లు చెబుతున్నారు.
రాష్ట్ర విభజన జరిగిన, ఎన్నికల సమీపిస్తున్న తరుణంలో పార్టీలో తన స్థానమేమిటో తేల్చుకుంటే తప్ప తదుపరి రాజకీయ భవిష్యత్తు నిర్ణయం కాదనే ఉద్దేశంతో బాలకృష్ణ ఉన్నట్లు చెబుతున్నారు. అందుకే, చంద్రబాబు తర్వాతి స్థానాన్ని తాను దక్కించుకుని, పార్టీ వ్యవహారాలపై పట్టు సాధించాలనే ఉద్దేశంతో బాలకృష్ణ వ్యవహరిస్తున్నట్లు చెబుతున్నారు.
తాజా పరిణామాలు తెలుగుదేశం పార్టీని కలవరపెడుతున్నట్లే ఉంది. బాలకృష్ణ ఎక్కడ కావాలంటే అక్కడ పోటీ చేయవచ్చనని, ఏ సీటు కావాలంటే ఆ సీటు ఇవ్వడానికి పార్టీ సిద్ధంగా ఉందని పార్టీ వర్గాలు చెబుతున్నట్లు వార్తలు వచ్చాయి. అయితే, బాలకృష్ణ ఆశిస్తున్నది కేవలం తాను పార్లమెంటుకో, శాసనసభకు మాత్రమో వెళ్లడం కాదని, అంతకన్నా పార్టీపై ఏదో మేరకు తనకు పట్టు కావాలని బాలకృష్ణ ఆశిస్తున్నట్లు చెబుతున్నారు.