కెమెరామెన్లపై బౌన్సర్ల దాడి, హర్భజన్ సారీ: అరెస్టు

జలంధర్: టీమిండియా స్పిన్నర్ హర్భజన్ సింగ్ వివాహ వేడుక వద్ద గురువారం చిన్నపాటి ఘర్షణ చోటు చేసుకుంది. బాలీవుడ్ నటి, మోడల్ గీతా బస్రాతో హర్భజన్ పెళ్లి పంజాబ్‌లోని జలంధర్‌లో నిన్న అంగరంగవైభవంగా జరిగింది.

భజ్జీ పెళ్లి నేపథ్యంలో భారీ భద్రతను ఏర్పాటు చేశారు. చాలామంది బౌన్సర్లను ఉంచారు. భద్రతను పర్యవేక్షిస్తున్న బౌన్సర్లు వివాహ వేడుకను వీడియో తీస్తున్న కెమెరామెన్ల పైన దాడి చేశారు. దీంతో ఆగ్రహం వ్యక్తం చేసిన కెమెరామెన్లు పెళ్లి వేడుక ముందే నిరసనకు దిగారు.

ఈ విషయం తెలిసిన హర్భజన్ సింగ్ వచ్చి పరిస్థితిని సాధారణ స్థితికి తీసుకొచ్చారు. దాడి చేసిన బౌన్సర్ల తరఫున హర్భజన్ సింగ్ క్షమాపణలు చెప్పడంతో కెమెరామెన్లు కూడా శాంతించారు.

అయితే, ఆ తర్వాత దీనిపై పోలీసు స్టేషన్లో కేసు నమోదైంది. కెమెరాలు దగ్ధం చేశారని చెబుతూ నలుగురు బౌన్సర్లను పోలీసులు అదుపులోకి తీసుకున్నారు. బబ్బల్, గుర్‌ప్రీత్, నవజోత్, కుల్దీప్ అనే నలుగురు బౌన్సర్లను పోలీసులు అరెస్టు చేశారు.

English summary

Some photojournalists were allegedly manhandled by bouncers outside the house of Indian cricketer Harbhajan Singh during his wedding ceremony here.