నిమజ్జనంలో కోదండVsఅశోక్! (పిక్చర్స్)

By Srinivas

Updated: Thursday, September 19, 2013, 12:07 [IST]

వినాయక నిమజ్జనంలో 'రాజకీయం - విభజన' కనిపించింది. భక్తుల పూజలు అందుకున్న గణనాథుడు బుధవారం నిమజ్జనం కోసం సాగర తీరం తరలి వెళ్లాడు. ఈ సమయంలో కొందరు భక్తులు గణనాథుడికి జై కొట్టడంతో పాటు తమ తమ పార్టీ నేతలకు అనుగుణంగా, సమైక్య, తెలంగాణలకు అనుకూలంగా జోరుగా నినాదాలు చేశారు.

హైదరాబాదులో జరిగిన నిమజ్జనం కార్యక్రమంలో ప్రధానంగా గుజరాత్ ముఖ్యమంత్రి నరేంద్ర మోడీ నినాదాలు మారుమోగాయి. అలాగే జై తెలంగాణ నినాదాలు వినిపించాయి. సీమాంధ్ర జిల్లాల్లో జరిగిన వినాయక ఉత్సవాల్లోను సమైక్యాంధ్ర నినాదాలు మిన్నంటాయి. నిమజ్జనానికి తరలించే గణనాథుడి వాహనాలను పార్టీల జెండాలతో కూడా అలంకరించారు.

అయితే, నిమజ్జనంలో ఆయా పార్టీల నాయకులకు జై కొట్టడాలను మరికొందరు తప్పుపడుతున్నారు. ఇది అందరి పండుగ అని, అలాంటప్పుడు నాయకులకు, ఇతర అంశాలను ఇందులోకి తీసుకు రావొద్దని కొందరు అంటున్నారు. నిమజ్జనంలో బిజెపి శ్రేణుల మోడీ జపంపై సిపిఐ నారాయణ, సిపిఎం రాఘవులు ఆగ్రహం వ్యక్తం చేశారు.

నిమజ్జనంలో అశోక్ వర్సెస్ కోదండ!

వినాయక నిమజ్జనం సందర్భంగా తెలంగాణ రాజకీయ ఐక్యకార్యాచరణ సమితి చైర్మన్ కోదండరామ్, ఎపిఎన్జీవో అధ్యక్షుడు అశోక్ బాబు రూపాల్లో బాక్సింగ్ దృశ్యం.

నిమజ్జనంలో

వినాయక నిమజ్జనం సందర్భంగా తెలంగాణ రాజకీయ ఐక్యకార్యాచరణ సమితి చైర్మన్ కోదండరామ్, ఎపిఎన్జీవో అధ్యక్షుడు అశోక్ బాబు రూపాల్లో బాక్సింగ్ చేస్తున్న దృశ్యం. వెనుక ముఖ్యమంత్రి కిరణ్ కుమార్ రెడ్డి, తెరాస అధ్యక్షుడు కల్వకుంట్ల చంద్రశేఖర రావుల ముఖచిత్రాలతో..

సామరస్యం

నిమజ్జనం కోసం చార్మినార్ మీదుగా వెళ్తున్న లంబోదరులను ఆసక్తిగా తిలకిస్తున్న ఓ ముస్లిం. గణేష్ నిమజ్జన కార్యక్రమంలో అన్ని వర్గాల వారు పాల్గొన్నారు.

నిమజ్జనంలో తెలంగాణం

బుధవారం రాష్ట్ర రాజధాని హైదరాబాదులో జరిగిన నిమజ్జన కార్యక్రమంలో తెలంగాణ పటాన్ని ప్రదర్శిస్తున్న తెలంగాణవాదులు. '29వ రాష్ట్రం తెలంగాణ శుభాకాంక్షలు' అంటూ ప్రదర్శించిన దృశ్యం.