మెగా కాంపౌండ్ లో తళుక్కుమన్న మలయాళ స్టార్- ఊహాగానాలకు ఆజ్యం?

ప్రముఖ నిర్మాత అల్లు అరవింద్ తనయుడు, హీరో అల్లు శిరీష్ వివాహ తేదీ దగ్గరపడుతోంది. తన ప్రియురాలు నయనికతో కలిసి ఈ నెల 6వ తేదీన పెళ్లిపీటలు ఎక్కనున్నాడు. దీనికి సంబంధించిన కార్యక్రమాలు అల్లు వారి ఇంట ఆరంభం అయ్యాయి. ప్రస్తుతం ప్రీ వెడ్డింగ్ ఫంక్షన్ వేడుకగా సాగుతోంది. ఈ పెళ్లి పనులన్నింటినీ కూడా అల్లు అర్జున్, ఆయన భార్య స్నేహా రెడ్డి దగ్గరుండి చూసుకుంటోన్నారు. కుటుంబ సభ్యులతో సరదాగా గడుపుతున్నారు.

అల్లు శిరీష్, నయనికల నిశ్చితార్థ వేడుక గత ఏడాది అక్టోబర్ 31వ తేదీన జరిగిన విషయం తెలిసిందే. కుటుంబ సభ్యులు, సన్నిహితుల మధ్య ఘనంగా ఈ కార్యక్రమాన్ని నిర్వహించింది అల్లు అరవింద్ కుటుంబం. ఈ సందర్భంగా వారు ఉంగరాలు మార్చుకున్నారు. అప్పట్లో పెళ్లి తేదీని వెల్లడించలేదు. ఈ ఏడాది పెళ్లి జరుగుతుందనే హింట్ అప్పుడే ఇచ్చారు. దీనికి అనుగుణంగా మార్చి 6వ తేదీన ముహూర్తాన్ని ఖరారు చేశారు.

కాగా- ప్రీ వెడ్డింగ్ ఫంక్షన్ కు మలయాళ స్టార్ హీరో- దర్శకుడు బాసిల్ జోసెఫ్ హాజరయ్యాడు. ఇది ఫిల్మ్ ఇండస్ట్రీలో బిగ్ టాక్ కు దారి తీసింది. అల్లు అర్జున్‌తో ఓ ప్రాజెక్ట్ గురించిన ఊహాగానాలకు దారితీసింది. బాసిల్ జోసెఫ్ త్వరలో తెలుగు చిత్ర పరిశ్రమలో అడుగుపెట్టవచ్చని, సూపర్‌స్టార్ అల్లు అర్జున్‌తో కలిసి పని చేసే అవకాశం ఉందనే అభిప్రాయాలు వ్యక్తమౌతోన్న ప్రస్తుత పరిస్థితుల్లో ఈ ఫంక్షన్ కు అటెండ్ కావడం ప్రాధాన్యతను సంతరించుకుంది.

ఈ వేడుకకు సంబంధించిన ఫోటోలు, వీడియోలు సోషల్ మీడియాలో లో విస్తృతంగా వ్యాపించాయి. దీంతో బాసిల్, అల్లు అర్జున్ కలిసి ఏదైనా ప్రాజెక్ట్ చేస్తారా అనే చర్చకు దారితీసింది. సినిమా ఫోరమ్‌లు, సామాజిక మాధ్యమాల్లో ఈ ప్రచారం ఊపందుకుంది. ఏదో ఆసక్తికర ప్రాజెక్ట్ సిద్ధమవుతోందంటూ రెడ్డిట్ యూజర్లు వ్యాఖ్యానించారు. బిగ్ ప్రాజెక్ట్ లోడింగ్.. అంటూ ఎక్స్ లో నెటిజన్లు కామెంట్స పోస్ట్ చేస్తోన్నారు. బాసిల్ జోసెఫ్ లేదా అల్లు అర్జున్ నుండి దీనిపై ఎటువంటి అధికారిక ప్రకటన రాలేదు.

బాసిల్ జోసెఫ్ మలయాళీ సూపర్ హీరో చిత్రం 'మిన్నల్ మురళి'తో జాతీయ స్థాయిలో గుర్తింపు పొందాడు. టోవినో థామస్ నటించిన ఈ చిత్రం అతన్ని మలయాళ చిత్ర పరిశ్రమలో స్టార్ దర్శకులలో ఒకడిగా నిలిపింది. అప్పటి నుండి, బాసిల్ నటనపై కూడా దృష్టి సారించాడు. ప్రధాన పాత్రలు పోషిస్తూనే, దర్శకత్వానికీ ప్రాధాన్యత ఇస్తోన్నాడు. మే లో విడుదల కానున్న 'అతిరాది' చిత్రంలో బాసిల్ నటించాడు.

English summary

Basil Joseph, Malayalam filmmaker actor may be on the verge of a major Telugu foray, and fans believe a collaboration with superstar Allu Arjun could be in the works. అల్లు అర్జున్‌తో ఓ ప్రాజెక్ట్ గురించిన ఊహాగానాలకు దారితీసింది.