మరో 100 కోట్ల బొమ్మ.. హిట్ మీద హిట్ కొట్టడం నీకే సాధ్యం అన్న

కోలీవుడ్ యూత్ క్రేజీ హీరో ప్రదీప్ రంగనాథన్ గురించి తెలుగు ప్రేక్షకులకు కొత్తగా పరిచయం చేయాల్సిన అవసరం లేదు. వరుస విజయాలతో ప్రత్యేక గుర్తింపు సంపాదించుకున్నాడు. కోమలి సినిమాతో దర్శకుడిగా మెప్పించిన ప్రదీప్.. Love Todayతో యువతలో మంచి క్రేజ్ తెచ్చుకున్నాడు. డ్యూడ్, డ్రాగన్ చిత్రాలతో వరుస సక్సెస్ లను తన ఖాతాలో వేసుకున్నాడు. ఇప్పుడు మరో వినూత్న కాన్సెప్ట్‌తో ప్రేక్షకుల ముందుకు వచ్చాడు.

టాలెంటెడ్ డైరెక్టర్, స్టార్ హీరోయిన్ నయనతార భర్త Vignesh Shivan దర్శకత్వంలో హీరోగా నటించిన చిత్రం 'Love Insurance Company (LIK)'. రొమాంటిక్ డ్రామాగా తెరకెక్కిన ఈ చిత్రంలో Krithi Shetty కథానాయికగా నటించింది. తెలుగు, తమిళ భాషల్లో ఏకకాలంలో విడుదలైన ఈ సినిమాపై ప్రేక్షకుల్లో ఇప్పటికే భారీ అంచనాలు ఉన్నాయి. ఫ్యూచరిస్టిక్ లవ్ స్టోరీగా వచ్చిన ఈ సినిమా ప్రేక్షకులను ఎంతవరకు ఆకట్టుకుందో చూద్దాం.

సినిమా కథ..

2040 నేపథ్యంలో ఈ కథ సాగుతుంది. అప్పటి ప్రపంచం మొత్తం 'లవ్ ఇన్సూరెన్స్ కంపెనీ (LIK)' అనే యాప్ ఆధీనంలో ఉంటుంది. ఎవరు ఎవరిని ప్రేమించాలి, ఎప్పుడు విడిపోవాలి అన్నది ఈ యాప్ నిర్ణయిస్తుంది. సూర్య (S. J. Suryah) రూపొందించిన ఈ యాప్ యువత జీవితాలను పూర్తిగా ప్రభావితం చేస్తుంది. ధీమా (కృతి శెట్టి) ఈ యాప్ సూచనలను అంధంగా అనుసరించే యువతి. మరోవైపు ఫోన్‌లకు దూరంగా ఉండే 'ఆర్గానిక్ వరల్డ్'కు చెందిన వైబ్ వాసు (ప్రదీప్ రంగనాథన్) ఆమెను చూసి ప్రేమలో పడతాడు. ఇద్దరూ దగ్గరవుతారు. కానీ 'లవ్ స్కోర్' అనే ఫీచర్ వాళ్ల ప్రేమను పరీక్షిస్తుంది. యాప్ చెప్పిందే నిజమని నమ్మిన ధీమా, వాసును వదిలేస్తుంది. ప్రేమను ఒక యాప్ నిర్ణయించలేదని నిరూపించడానికి వాసు ఏం చేశాడు? సూర్య పాత్ర ఇందులో ఎలా ప్రభావం చూపింది? చివరికి ప్రేమ గెలిచిందా? అనేది మిగతా కథ.

మూవీ విశ్లేషణ..

టెక్నాలజీ ఆధారంగా ప్రేమను కొలిచే కాన్సెప్ట్ చాలా కొత్తగా అనిపిస్తుంది. ఫోన్ అడిక్షన్, సోషల్ మీడియా ప్రభావం వంటి అంశాలను ఫ్యూచర్ సెటప్‌లో చూపించాలన్న ప్రయత్నం మంచి ఐడియా. అయితే, ఆ ఐడియాను పూర్తి స్థాయిలో స్క్రీన్‌పై చూపించడంలో దర్శకుడు విఫలమయ్యాడనే భావన కలుగుతుంది. ఫస్ట్ హాఫ్ కథలోకి తీసుకెళ్లే ప్రయత్నంగా సాగుతుంటే, మెయిన్ కాన్ఫ్లిక్ట్ సెకండ్ హాఫ్‌లోనే మొదలవుతుంది. అక్కడి నుంచి కథ కొంచెం ల్యాగ్ అవుతూ, ఆసక్తి తగ్గిస్తుంది. ఫ్యూచరిస్టిక్ ప్రపంచాన్ని పూర్తిగా నమ్మించేలా చూపించలేకపోయారు. 'ఆర్గానిక్ వరల్డ్' కాన్సెప్ట్ కూడా సహజంగా అనిపించదు.

లీడ్ పెయిర్ మధ్య భావోద్వేగ బలం తక్కువగా ఉండటం కథకు పెద్ద మైనస్. క్లైమాక్స్ కూడా ముందే ఊహించగలిగేలా ఉండటం నిరాశ కలిగిస్తుంది. కొన్ని చోట్ల S. J. Suryah, ప్రదీప్ మధ్య వచ్చే సన్నివేశాలు మాత్రమే ఎంటర్టైన్ చేస్తాయి.

నటీనటుల ప్రదర్శన..

• Pradeep Ranganathan తనకు అలవాటైన పాత్రలో సహజంగా నటించాడు. అయితే గత చిత్రాల్లో కనిపించిన ఎనర్జీ ఇందులో కొంచెం తక్కువగా అనిపిస్తుంది.
• Krithi Shetty పాత్రకు తగినంత డెప్త్ లేకపోవడంతో, ఆమె ప్రతిభ పూర్తిగా బయటపడలేదు.
• సినిమాలో ఎక్కువగా ఆకట్టుకునేది S. J. Suryah. తన స్టైల్‌లో ఎంటర్టైనింగ్ విలన్‌గా నిలిచి, సినిమాకు కొంత ఉత్సాహం తీసుకొచ్చాడు. మిగతా నటీనటులు తమ పాత్రల పరిధిలో సరిపడ్డారు.

సాంకేతిక విభాగం..

• సంగీత దర్శకుడు Anirudh Ravichander అందించిన పాటలు పెద్దగా గుర్తుండవు. బ్యాక్‌గ్రౌండ్ స్కోర్ మాత్రం కొన్ని సన్నివేశాల్లో బాగుంది.
• సినిమాటోగ్రఫీ విజువల్స్ పరంగా పర్వాలేదనిపించినా, 2040 ప్రపంచాన్ని పూర్తిగా నమ్మించేలా చూపించలేకపోయింది.
• ఎడిటింగ్‌లో ల్యాగ్ స్పష్టంగా కనిపిస్తుంది-ముఖ్యంగా ఫస్ట్, సెకండ్ హాఫ్‌లలో కొన్ని సన్నివేశాలు ట్రిమ్ చేసి ఉంటే బాగుండేది.
• డబ్బింగ్ విషయంలో కూడా కొంత లోపం కనిపిస్తుంది, ఇది తెలుగు ప్రేక్షకులకు కనెక్ట్ అవ్వడాన్ని తగ్గించింది. అయితే నిర్మాణ విలువలు మాత్రం బాగున్నాయి.

ప్లస్ పాయింట్స్..

• కొత్త కాన్సెప్ట్
• S. J. Suryah నటన
• కొన్ని ఎంటర్టైనింగ్ సన్నివేశాలు

మైనస్ పాయింట్స్..

• వీక్ స్క్రీన్‌ప్లే
• ఎమోషనల్ డెప్త్ లోపం
• ల్యాగ్
• ప్రిడిక్టబుల్ క్లైమాక్స్

ఫైనల్ వెర్డిక్ట్..

ఎలాంటి అంచనాలు లేకుండా వెళితే ఓకే అనిపించవచ్చు.

రేటింగ్..

2.5/5

English summary

Kollywood's youth-crazy hero Pradeep Ranganathan needs no introduction to the Telugu audience. He has earned a special recognition with his consecutive successes.