సచిన్ కు నిండా 36

భారత క్రికెట్ మాంత్రికుడు సచిన్ టెండూల్కర్ 36 ఏళ్ల పడిలో అడుగు పెట్టాడు. శుక్రవారం ఏప్రిల్ 24వ తేదీతో ఆయనకు 36 ఏళ్లు వచ్చాయి. ప్రపంచ క్రికెట్ క్రీడలో డాన్ బ్రాడ్ మాన్ అంతటి వాడిగా పేరు పొందిన టెండూల్కర్ దక్షిణాఫ్రికాలో జరుగుతున్న ఇండియన్ ప్రీమియర్ లీగ్ (ఐపియల్)లో ముంబయి ఇండియన్స్ కు నాయకత్వం వహిస్తున్నాడు.

తన వయస్సు ఇంకా 16 ఏళ్లే అన్నట్లుందని, శుభాకాంక్షల వల్ల, దీవెనల వల్ల అటువంటి భావన కలుగుతోందని ఆయన అన్నారు. తాను రికార్డులను బద్దలు కొట్టడం గురించి మాట్లాడడం లేదని, మ్యాచుల విజయం గురించి మాట్లాడుతున్నానని, విజయం సాధించడం గొప్ప భావనను కలిగిస్తుందని, అదే లెక్కలోకి వస్తుందని ఆయన అంటున్నాడు. ముంబయి ఇండియన్స్ జట్టు సభ్యులతో కలిసి తన బర్త్ డే కేక్ కట్ చేసిన అనంతరం ఆయన చెప్పిన మాటలవి.

సచిన్ టెండూల్కర్ తన 16 ఏళ్ల వయసులో అంతర్జాతీయ క్రికెట్ లోకి అడుగు పెట్టాడు. పాకిస్తాన్ తో తన అంతర్జాతీయ కెరీర్ ను ప్రారంభించాడు. అప్పటి నుంచి అతనికి ఎదురు లేకుండా పోయింది. పరుగుల వరద పారిస్తూ రికార్డులు బద్దలు కొడుతూ ముందుకు సాగుతున్నాడు. సచిన్ టెస్టు మ్యాచుల్లో 12 వేలకు పైగా పరుగులు సాధించాడు. వన్డేల్లో 16 వేలకు పైగా పరుగులు చేశాడు. వ్యక్తిగత ఆటతీరు పరిగణనలోకి వచ్చినా జట్టు ఆటతీరే లెక్కలోకి వస్తుందని సచిన్ అన్నాడు.సెంచరీల రికార్డును సాధించాడు.