సల్మాన్, షారూఖ్ వార్

బాలీవుడ్ నటులు సల్మాన్ ఖాన్, షారూఖ్ ఖాన్ ల మధ్య యుద్ధం ముగిసినట్లు లేదు. చాలా కాలంగా వారిద్దరి మధ్య పచ్చగడ్డి వేస్తే భగ్గుమంటోంది. నిరుడు 2008లో బాలీవుడ్ నటి కత్రినా కైఫ్ జన్మదిన వేడుకల్లో వీరిద్దరూ గొడవ పడ్డారు. తన దస్ కా దమ్ గేమ్ షోకు సల్మాన్ షారూఖ్ ఖాన్ ను ఆహ్వానించాడు. అందుకు షారూఖ్ అంగీకరించాడు కూడా . అదే సమయంలో షారూఖ్ ఖాన్ తన ప్రియ మిత్రుడు సల్మాన్ ను కళాశాల ఉత్సవానికి ఆహ్వానించాడు. దీంతో వారిద్దరి మధ్య స్నేహం వికసించి మూడు పూవులు ఆరు కాయలుగా వర్ధిల్లుతుందని భావించారు.

అయితే తాజాగా అమెరికాలోని విమానాశ్రయంలో షారూఖ్ నిర్బంధం వీరిద్దరి మధ్య కొత్త వివాదాన్ని సృష్టించింది. సూపర్ స్టార్ అయినంత మాత్రాన, అందరికీ తెలిసినంత మాత్రాన షారూఖ్ ను నిర్బంధించడం అంత పెద్ద డీల్ ఏమీ కాదని సల్మాన్ ఖాన్ వ్యాఖ్యానించి పాత శత్రుత్వానికి కొత్తగా ఆజ్యం పోశాడు. ఈ వ్యాఖ్యలపై మీడియా ప్రతినిధులు ప్రశ్నించినప్పుడు షారూఖ్ ఖాన్ తనదైన వ్యంగ్యశైలిలో ప్రతిస్పందించాడు. తమ తలుపులు తాము మూసుకునే వారికి అది సాధారణమేనని, తనకు మాత్రం ఇది తొలిసారి అని, తనకు అది చెడుగా కనిపించిందని, మరోసారి జరిగితే అలా ఉండకపోవచ్చునని షారూఖ్ అన్నాడు. దీన్ని బట్టి ఖాన్ ల మధ్య మాటల యుద్ధం ఉందని అర్థమవుతోంది.