అదరగొడుతున్న తెలుగు శ్రీరామ్

ఇండియన్ ఐడల్ లో తెలుగు తేజం శ్రీరామ్ చంద్ర అదరగొడుతున్నాడు. తన గాన మాధుర్యంతో ఊపేస్తున్నాడు. హైదరాబాద్ కు చెందిన ఇండియన్ ఐడల్ లో నాలుగో స్థానానికి చేరుకున్నాడు. డ్యాన్స్ చేస్తూ పాట పాడి టీవీ ప్రేక్షకులను, జడ్జిలను అలరించాడు. బాలీవుడ్ నటి కంగనా రౌనత్ కు ఇష్టమైన పాట పాడి ఆమె మనసు దోచుకున్నాడు. హైదరాబాదుకు చెందిన శ్రీరామ్ ప్రజల మనసులు దోస్తూ ముందుకు దూకుతున్నాడు. శ్రీరామ్ తెలుగు సినిమాల్లో కొన్ని పాటలు కూడా పాడాడు. ఇండియన్ ఐడల్ పోటీలతో జాతీయ స్థాయిలో స్టార్ డమ్ ను సంపాదించుకున్నాడు. నిలకడైన పెర్ ఫార్మెన్స్ తో ప్రతి ఒక్కరినీ అతను ఆకట్టుకుంటున్నాడు. సంగీత దర్శకులు సలీం - సులేమాన్ ల మనస్సు దోచుకున్నాడు. శ్రీరామ్ గాన మాధుర్యానికి డ్రీమ్ గర్ల్ హేమమాలిని కూడా ఫిదా అయిపోయారు. అతనితో తెలుగులో మాట్లాడి తన దక్షిణాది అభిమానాన్ని ఆమె చాటుకుంది.

గతంలో తెలుగువాడైన కారుణ్య ఇండియన్ ఐడల్ లో ఫైనల్ వరకు చేరుకున్నాడు. నిజానికి, ఇటువంటి కార్యక్రమాల్లో ఉత్తరాదివారు ఎక్కువ అవకాశాలు పొందుతారు. ఉత్తరాది వారికి వోటింగ్ రూపంలో ఎక్కువ లాభం చేకూరుతుంది. దక్షిణాది వారు ఎస్ఎంఎస్ ల ద్వారా వోటింగ్ లో పాల్గొనడంలో వెనకబడిపోయారు. ఎస్ఎంఎస్ లు పంపడానికి దక్షిణాది వారు ఎక్కువ ఆసక్తి చూపరు. దాంతో దక్షిణాదివారు ఇటువంటి కార్యక్రమాల్లో ఎంత బాగా పెర్ఫామ్ చేసినా వెనకబడి పోయే ప్రమాదం ఉంటుంది. వోటు చేయడం ద్వారా శ్రీరామ్ ను ప్రోత్సహించాలని ఇటీవల ఆయన తండ్రితో పాటు కొంత మంది నేపథ్య గాయకులు హైదరాబాదులో ప్రెస్ మీట్ ఏర్పాటు చేసి విజ్ఞప్తి చేశారు. ఎంత బాగా కార్యక్రమం ఇచ్చినా పబ్లిక్ వోటింగ్ బాగా ఉంటేనే శ్రీరామ్ ఫైనల్ దాకా చేరుకుని విజయం సాధించగలడని ఎంఎస్ఎన్ ప్రసాద్ అన్నారు.

హైదరాబాదీ టైటిల్ గెలవాల్సిన సమయం ఆసన్నమైందని, అందుకు శ్రీరామ్ ను ప్రోత్సహించాలని టీవీ రియాల్టీ షో జడ్జిల్లో ఒక్కరైన కె. కృష్ణ చైతన్య అన్నారు. శ్రీరామ్ తనకు ఏడేళ్లుగా తెలుసునని, తనకు మంచి మిత్రుడని, జాతీయ ప్రేక్షకుల ముందు అద్భుతంగా రాణిస్తుండడం తనకు ఆనందంగా ఉందని ఆయన అన్నారు. అతనికి వోటేద్దాం, గెలిపిద్దాం అని ఆయన పిలుపునిచ్చారు. శ్రీరామ్ పెర్ ఫార్మెన్స్ ను ప్రతి ఒక్కరు ఇష్టపడుతున్నారు, అయితే వోటింగ్ మాత్రం నిరాశాజనకంగా ఉంది. శ్రీరామ్ ను ప్రోత్సహించాల్సిన అవసరం ప్రతి తెలుగువాడికే కాకుండా దక్షిణాది వాడికి కూడా ఉంది.