సిటీ బైక్ రేసర్లలో అజర్ తనయుడిది రెండో స్థానం

By Pratap

Published: Monday, May 28, 2012, 18:58 [IST]

హైదరాబాదులోని అత్యుత్తమ బైక్ రేసర్లలో పార్లమెంటు సభ్యుడు, భారత క్రికెట్ జట్టు మాజీ కెప్టెన్ మొహ్మద్ అజరుద్దీన్ తనయుడు అయాజుద్దీన్‌ది రెండో స్థానమని చెబుతున్నారు. అయితే, ఇది అనధికారికమై ఉజ్జాయింపు. అయాజుద్దీన్ ఇటీవల బైక్ రేసు ప్రమాదంలో మరణించిన విషయం తెలిసిందే. అనధికారిక అంచనాల ప్రకారం - బైక్ రేసులో హైదరాబాదులోని బైక్ రేసర్లలో అయాజ్‌ది రెండో ర్యాంకు అని ఓ ఐపియస్ అధికారి చెప్పినట్లు ఓ ఆంగ్ల దినపత్రిక రాసింది. శని, ఆదివారాల్లో అయాజుద్దీన్ హైదరాబాదు అవుటర్ రింగ్ రోడ్డుపై రేసులో పాల్గొంటాడని చెప్పినట్లు ఆ పత్రిక రాసింది.

బహుశా, ఈ నెల 11వ తేదీన బైక్‌పై ప్రాక్టీసు చేస్తుండగా ఆయాజుద్దీన్ ప్రమాదానికి గురై ఉంటాడని అంటున్నారు. తన సోదరుడు అసదుద్దీన్‌కు ఓ రేసు బైక్ ఉండడంతో తనకు సుజ్కీ జిఎస్ఎక్స్ - ఆర్ 1000 బైక్ కావాలని తల్లిదండ్రుల వద్ద అతను మారాం చేశాడట. దాంతో అతనికి ఆ బైక్ కొనిచ్చినట్లు చెబుతారు. ఫిబ్రవరి నుంచి అయాజ్ రింగ్ రోడ్డుపై బైక్ స్వారీని ప్రాక్టీస్ చేస్తున్నాడట. తన బైక్ రైడింగ్ ఫోటోలను అయాజ్ ఫేస్‌బుక్‌లో పోస్టు చేశాడని కూడా చెబుతున్నారు. అయాజ్‌పై పెట్టిన కేసును పోలీసులు మూసేసినట్లు తెలుస్తోంది.

Published On May 28, 2012